Otandyq eksporttaýshylar shyǵyndarynyń bir bóligi óteledi – saýda mınıstri

NUR-SULTAN. QazAqparat – Otandyq eksporttaýshylardy qoldaý úshin shyǵyndarynyń bir bóligi óteledi. Bul týraly QR Saýda jáne ıntergratsııalar mınıstri Baqyt Sultanov aıtty, dep habarlaıdy QazAqparat tilshisi.

«Jıi qoıylatyn suraqtardyń biri – logıstıkalyq qoljetimdilik jáne onyń qunynyń artýy máselesi. Biz eksporttaýshylardy qoldaý úshin eksporttyq shyǵyndardyń bir bóligin, sonyń ishinde taýarlardy jetkizý jáne ilgeriletý boıynsha shyǵyndy óteý quralyn iske qostyq. Qazirgi ýaqytta bizde 4 mlrd astam teńgege 220-ǵa jýyq ótinim bar. Ótinimderdiń negizgi bóligi logıstıka baǵytynda. Árıne, bul quraldyń da kemshilikteri bar ekeni túsinikti. Kásipkerler bizge tez sheshim qabyldaý úshin rásimdi, bıýrokratııany qysqartýǵa kómektesýi tıis dep oılaımyn»

, - dedi mınıstr elordada Qazaqstan eksporttaýshylarynyń birinshi forýmynda.

Saýda mınıstriniń aıtýynsha, baǵdarlama nátıjesinde 900-ge jýyq jumys ornyn qurý kózdelip otyr.

«Sondaı-aq, shyǵyndardyń bir bóligin óteý túrindegi qoldaý nátıjesinde 2023 jylǵa qaraı 104 kompanııa eksport kólemin 76 mlrd teńgege, salyq aýdarymdaryn 6 mlrd teńgege arttyrýdy josparlap otyr»

, - dedi ol.

Buǵan deıin Baqyt Sultanov Reseıge qarsy sanktsııalar Qazaqstan eksportyna qalaı áser etkenin aıtqan edi.

Sonymen birge, Qazaqstandaǵy belsendi eksporttaýshylar sany 540-tan asty, bul kórsetkish jyldan-jylǵa artyp keledi.