Otandyq dári-dármekterdiń ishki naryqtaǵy úlesin 50%-ǵa deıin jetkizý sharalary talqylandy
Densaýlyq saqtaý mınıstri Ajar Ǵınııattyń aıtýynsha, bul kórsetkishke qol jetkizý úshin respýblıkanyń farmatsevtıkalyq jáne medıtsınalyq ónerkásibin damytý, ǵylymı jáne kadrlyq áleýetti arttyrý, normatıvtik-quqyqtyq bazany jetildirý jáne jalpy farmatsevtıkalyq sektordy tsıfrlandyrý boıynsha sharalar qabyldanyp jatyr.
Osy oraıda, birlesken kásiporyndar ashý jáne álemdik farmatsevtıkalyq ındýstrııanyń jetekshi kompanııalarynyń óndiristerin lokalızatsııalaý boıynsha belsendi túrde jumys júrgizile bastady. Olardyń qatarynda Hoffmann-La Roche (Shveıtsarııa), Pfizer (AQSh), Novo Nordisk (Danııa), Takeda (Japonııa), SK Plasma (Ońtústik Koreıa) jáne t.b. bar.
Keńeste Farmatsevtıkalyq qyzmetti qoldaý jáne damytý qaýymdastyǵynyń basshysy Marına Dýrmanova óz usynystaryn aıtty. Ol medıtsınalyq ónimderdi jetkizýshiler men biryńǵaı memlekettik satyp alýshy arasyndaǵy uzaq merzimdi sharttardy uzartý, baǵa belgileý, salyq salý, tańbalaý, arnaıy ekonomıkalyq aımaqtar men farmatsevtıkalyq klasterler qurý, otandyq preparattar men medıtsınalyq buıymdardy tirkeý rásimderin jeńildetý, kredıttik resýrstarǵa qoljetimdilikti keńeıtý, eksportty qoldaý jáne t.b. máselelerdi qozǵady.
Álıhan Smaıylov Densaýlyq saqtaý mınıstrligine aıtylǵan usynystardy taldap, olardy Elimizde óndirilgen dári-dármekterdiń ishki naryqtaǵy úlesin 50%-ǵa jetkizý boıynsha jol kartasynda eskerýdi tapsyrdy.
Talqylaýdy qorytyndylaı kele, Úkimet basshysy sońǵy birneshe jylda Qazaqstannyń farmatsevtıka salasy turaqty ósim kórsetip otyrǵanyn atap ótti: shyǵarylatyn preparattardyń assortımenti keńeıip, kólemi ulǵaıa tústi. Alaıda, olardyń ishki naryqtaǵy úlesi baıaý ósip otyr, qazirgi kórsetkish – 28%.
«Demek, biz dári-dármek óndirisin jyl saıyn turaqty túrde ósirýimiz qajet. Osyǵan baılanysty farmatsevtıkalyq kásiporyndardyń barlyǵyna revızııa júrgizý kerek. Biz olardyń damý áleýetin jáne qýatyn arttyrý múmkindikterin naqty bilýimiz kerek», - dedi Premer-Mınıstr.
Sonymen qatar Á. Smaıylov ómirlik mańyzy bar dárilik zattar men medıtsınalyq buıymdar boıynsha uzaq merzimdi sharttar jasasýdyń mańyzyn atap ótti.
«Onkologııalyq jáne júrek-qan tamyrlary aýrýlaryn emdeýge arnalǵan preparattarǵa erekshe nazar aýdarý kerek. Ol úshin aldaǵy jyldarǵa qajettilikti eskere otyryp, osyndaı dárilik zattardyń tizbesi bekitilýi tıis», - dedi Úkimet basshysy.
Premer-Mınıstr qaralǵan sharalardyń barlyǵy 2029 jylǵa deıingi tıisti Jol kartasynda kórsetilip, ony bir aı merzimde bekitý kerek dep túıindedi.