Otandyq dári-dármekterdiń ishki naryqqa shyǵýy jeńildeıdi- Atamqulov

NUR-SULTAN. QazAqparat – QR Indýstrııa jáne ınfraqurylymdyq damý mınıstri Beıbit Atamqulov otandyq farmatsevtıka kásiporyndaryna qandaı qoldaý kórsetiletinin aıtyp berdi, dep habarlaıdy QazAqparat tilshisi.

Bul sharalar farmatsevtıkalyq jáne medıtsınalyq ónerkásipti damytýdyń 2020-2025 jyldarǵa arnalǵan keshendi josparynda kórsetilgen. Bes jyldyq keshendi jospar 62 shara men 8 bólimnen quralǵan.

«Farmatsevtıkalyq qyzmetti zańnamalyq retteý aıasynda otandyq óndirýshiler men sheteldik ınvestorlar úshin farmatsevtıkalyq ónimderiniń ishki naryqqa shyǵýyn ońaılatý qarastyrylǵan. Satyp alýdaǵy jergilikti ónim úlesin ulǵaıtý jáne satyp alý merzimin qysqartý kózdeledi. Mysaly shet elderdiń tájirıbesine qarasaq, dárilik zattar aınalysyn bólek retteý men medıtsınalyq buıymdar aınalysyna qoıylatyn túrli talaptarǵa baılanysty naryqqa tez shyǵýyn qamtamasyz etedi», - deıdi mınıstr búgingi Úkimet otyrysynda.

Sonymen birge, kelisimshartta óndiris tetigi pysyqtalǵan. Ol otandyq taýar óndirýshiler bazasynda álemdik jáne otandyq farmatsevtıkalyq óndirýshilerdiń birlesken óndirisin jeńildetedi. Barlyq jergilikti atqarýshy organdar úshin jergilikti qamtý boıynsha KPI bekitilmek.

«Farmatsevtıkalyq ónimderdiń baǵalaryn tirkeý memlekettik qyzmet kórsetý formatyna aýystyrylady. Bul sharalardyń barlyǵy «Halyq densaýlyǵy jáne densaýlyq saqtaý júıesi týraly» kodekske jáne ózge de normatıvtik aktilerge ózgerister engizý arqyly iske asyrylady», - deıdi B. Atamqulov.

Aıta keteıik, jyl basynan beri otandyq kásiporyndar farmatsevtıka óndirisin 34,1% nemese 81,5 mlrd teńgege arttyrdy. Investıtsııa 5,2% artyp, 4,1 mlrd teńgeni qurady.

Osyǵan deıin otandyq kásiporyndardyń dári-dármek pen medıtsınalyq buıymdardyń 75% óndiretinin jazdyq.