Otandyq bıopreparat óndirýshilerge salyqtyq jeńildikter berý kerek – Kúnsulý Zakarıa

NUR-SULTAN. QazAqparat – Otandyq bıopreparat óndirýshiler úshin salyqtyq jeńildikter berý kerek. Bul týraly búgin Úkimet otyrysynda Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa aıtty, dep habarlaıdy QazAqparat tilshisi.

«Jetistikterge qaramastan ınstıtýt kelesi máselelerdi sheshýdi usynady: klınıkaǵa deıingi jáne klınıkalyq zertteýlerge qosymsha qarjylandyrý; DDU-da sertıfıkattaý úshin DSM ulttyq retteýshi jáne sarapshy organynyń jetilýiniń 3-shi deńgeıine qol jetkizýdi jedeldetý; Aýyl sharýashylyǵy mınıstrligimen ǵylymdy qajetsinetin ónimge uzaq merzimdi kelisimsharttar jasasýdy pysyqtaý; otandyq bıopreparattar óndirýshiler úshin salyqtyq jeńildikter kózdeý; eksportqa shyǵarylatyn bıopreparattar men ǵylymdy qajetsinetin ónimderdi sýbsıdııalaýdy kózdeý; dárilik preparattardy tirkeý kezinde baqylaý jáne saraptama rásimderiniń merzimderin ońtaılandyrý; materıaldyq-tehnıkalyq bazany jańartý», - dedi ınstıtýt basshysy.

Osy rette ol Memleket basshysynyń tapsyrmasy boıynsha BQPǴZI jáne «OtarBioPharm» bıofarmatsevtıkalyq zaýytynyń jumyskerleri úshin otandyq ǵalymdardy áleýmettik qoldaý aıasynda 60 páterli úsh turǵyn úı jáne dene shynyqtyrý-saýyqtyrý kesheni salynyp, paıdalanýǵa berilgenin atap ótti.

«Qazirgi ýaqytta BQPǴZI men «OtarBioPharm» JShS-niń búkil qyzmetkerleri turǵyn úımen qamtamasyz etilgen. Qyzmetkerlerdiń jalaqysy ótken jyldarmen salystyrǵanda ósti. Eger 2019 jyly ortasha jalaqy 205 myń teńgeni qurasa, 2021 jyly ǵalymnyń ortasha jalaqysy 405 myń teńgege deıin artty», - dedi Kúnsulý Zakarıa.