Otandyq BAQ ulttyq brendimizdi ilgeriletýge úlken úles qosyp júr – Prezıdent

ASTANA. QazAqparat – Otandyq buqaralyq aqparat quraldary ulttyq brendimizdi ilgeriletýge úlken úles qosýda. Bul pikirdi Prezıdent BAQ salasyndaǵy syılyqtar men granttardy tapsyrý kezinde aıtty, dep habarlaıdy QazAqparat.

«Búgin elimiz óz damýynyń jańa kezeńine aıaq basty. Ótken jyly júrgizilgen reformalar saıası júıeni jetildirýge, ári qaraıǵy qaıta qurýlarǵa jol ashýǵa múmkindik berdi. Memleket, medıa jáne qoǵam arasyndaǵy ózara is-qımyl ádil Qazaqstan qurý isinde berik irgetas bolýǵa tıis. Bul yntymaqtastyq ashyqtyq, senim jáne adaldyq prıntsıpterine negizdelýi kerek», - dedi Memleket basshysy.

Prezıdent buqaralyq aqparat quraldary qoǵamdyq sanany jańartýda, ulttyń jańa sapasyn qalyptastyrýda sheshýshi ról atqarýy keregin basa aıtty.

Sondyqtan jýrnalısterdiń qoǵamda eńbek pen kásipqoılyq kýltin ornatýǵa, azamattardyń óz eliniń taǵdyryna jaýapkershilikpen qaraýyn damytýǵa járdemdesýi mańyzdy.

«Ol úshin belsendi patrıotızm mysaldaryn kórsetip, zamanymyzdyń jalpyulttyq qurmetine laıyq shynaıy keıipkerlerin tabý kerek. Ózin tolyǵymen óz isine arnaıtyn, kásipkerlik pen tabandylyq tanytatyn adamdar kópshiliktiń nazarynda bolýy kerek. Otandyq buqaralyq aqparat quraldary bizdiń ulttyq brendimizdi ilgeriletýge úlken úles qosýda. Sizder elimizdiń baı tarıhı-mádenı murasy men biregeı tabıǵatyn kórsetetin qyzyqty maqalalar men shyǵarmashylyq sıýjetter jasaısyzdar. Bul adamdarǵa, onyń ishinde sheteldik aýdıtorııaǵa Qazaqstandy jaqsy bilýge jáne túsinýge, onyń áleýetin tolyq baǵalaýǵa kómektesedi», - dedi Qasym-Jomart Toqaev.