Otandyq azyq-túlik taýarlary shet elde úlken suranysqa ıe

ASTANA. QazAqparat - Aýǵanstan, BAÁ men Iranǵa ettiń eksporty bastaldy. Bul týraly Úkimet otyrysynda Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.

«Otandyq azyq-túlik taýarlary shet elderde úlken suranysqa ıe, jalpy eksporttyń kólemi 2 mlrd AQSh dollarynan asady nemese 145 mln tonna ónimdi qamtyp otyr. Atap aıtqanda, Aýǵanstan, BAÁ men Iranǵa et pen qus eti, Qytaıǵa ósimdik maıy men bal jetkizilimderi bastaldy», - deıdi mınıstr.

Osy oraıda J. Qasymbek 2016 jyly «Qazaq Organic Food», «KazMeat», «Halal Kazakhstan» (arnaıy sapa belgisimen salalyq jeli boıynsha biriktirilgen taýar toby) brendteri qurylǵanyn eske salyp ótti.

«Bolashaqta otandyq kásiporyndar biryńǵaı brendter aıasynda syrtqy naryqtarǵa shoǵyrlana alady. Qazirgi ýaqytta bul brendterdi damytý jáne ilgeriletý úshin jol kartasy ázirlenip,  múddeli organdarmen kelisilip jatyr»,- dedi vedomstvo basshysy.

Aıta keteıik, búgingi tańda Qazaqstan eksporttaýshy elderdiń ishinde 52-shi orynǵa ıe. Álemniń 113 eline 800-den astam óndiristik ónim túrlerin shyǵarýdamyz.