Otandyq avıakompanııalarda jyl saıyn 500-600 maman qajettiligi týyndaýy múmkin
Indýstrııa jáne ınfraqurylymdyq damý mınıstrliginiń «Ashyq saǵat alańyndaǵy» kezekti jıyn otandyq avıatsııa salasyndaǵy mańyzdy máselelerge arnaldy. Qazaqstandyq áýe kompanııalary men Azamattyq avıatsııa akademııasynyń ókilderiniń qatysýymen ótken basqosýda salanyń kadrlyq áleýetin arttyrý tarazalyndy.
Resmı málimetterge sáıkes, qazir elimizdegi azamattyq avıatsııa salasynda 20 myńǵa jýyq adam jumys isteıdi. Onyń 10 myńy áýejaılarda, 2 857 maman ushqyshtar quramynda eńbek etedi. Al, ınjenerlik-tehnıkalyq quramdaǵy jumysshylar sany – 1 767. Dese de, salanyń damýyna baılanysty 2025 jylǵa qaraı qyzmetkerlerge degen suranys sany jyl saıyn 500-600 adam bolady degen boljam jasalyp otyr.
Elimizde sertıfıkattalǵan 25 avıatsııalyq oqý ortalyǵy bar. Atalǵan mekemeler ushqyshtar, ınjenerlik jáne áýe qozǵalysyn dıspetcherlik qyzmet kórsetý quramy men avıatsııalyq stantsııa operatorlaryn alǵashqy daıarlaý, qaıta daıarlaý jáne biliktiligin jetildirý baǵytynda qyzmet kórsetedi.
Al, Azamattyq avıatsııa akademııasy – salaǵa qajetti mamandar daıarlaıtyn elimizdegi birden-bir joǵary oqý orny. Basqosý barysynda otandyq áýe kompanııalarǵa óz qyzmetkerlerin akademııada ushaqtardyń ushý kestesi men olarǵa tehnıkalyq qyzmet kórsetýdi josparlaý boıynsha kásibı biliktiligin jetildirý usynyldy.
Akademııa ókilderiniń aıtýynsha, qazir oqý ornynda otandyq avıatsııa salasyndaǵy mamandardyń bilimin arttyrý baǵytynda arnaıy keshendi jumystar júrgizilip jatyr. Basty maqsat – bilim berý baǵdarlamalaryn zamanaýı avıakompanııalardyń talaptaryna sáıkestendirý.
Sonymen qatar, jıynda akademııa túlekteriniń aǵylshyn tili deńgeıin arttyrý baǵytynda atqarylyp jatqan jumystar da talqylandy.
«Bilim alýshylardyń aǵylshyn tili deńgeıin kóterý baǵytynda úsh tilde bilim berýdi engizýdiń arnaıy jol kartasy qabyldanǵan. 2023 jyly akademııada profıldi pánder aǵylshyn tilinde júrgizilmek», - deıdi Azamattyq avıatsııa akademııasynyń ókilderi.
Kezdesý qorytyndysy boıynsha akademııanyń oqý baǵdarlamalaryn avıakompanııalardyń talaptaryna jáne halyqaralyq standarttarǵa sáıkestendirý boıynsha birlese jumys júrgizý týraly sheshim qabyldandy.