Otandyq 9 óndiris orny táýligine 490 myń dana medıtsınalyq maska shyǵarady

NUR-SULTAN. QazAqparat - Densaýlyq saqtaý júıesine jarty jylda qajetti maska kólemi - 111,2 mıllıon dana. Bul týraly Ortalyq kommýnıkatsııalar qyzmetinde ótken dárilik zattardy, medıtsınalyq ónimderdi jáne ókpeni jasandy jeldetý apparattaryn otandyq óndirý týraly brıfıngide aıtyldy, dep habarlaıdy QazAqparat tilshisi.

Densaýlyq saqtaý júıesine jarty jylda qajetti maska kólemi - 111,2 mıllıon dana. Osy qajettilikti óteý maqsatynda óndiris kólemi arttyryldy jáne 4 óndiris orny qosylyp, nátıjesinde bir táýlikte shyǵarylatyn medıtsınalyq maska men profılaktıkalyq qorǵaıtyn maska sany 1,1 mıllıonǵa jetken.

«70 tigin tigý kásiporyndaryna osyndaı qıyn kezeńde shette qalmaı, maska tikkenderi úshin alǵys aıtamyn. «Azala Textile» JShS dáke shyǵaratyn 9 stanokty iske qosyp, dáke shyǵarý kólemin 8 esege arttyrdy. Tigin tigý kásiporyndaryna arnap táýligine 1,2 metrden bastar 10 myń metr dáke shyǵarady», - deıdi QR Indýstrııa jáne ınfraqurylymdyq damý vıtse-mınıstri Amanııaz Erjanov.

Onyń aıtýynsha, TJ kezinde atalǵan JShS tigin tigý kásiporyndaryn tyǵyzdyǵy az maqtadan toqylǵan matamen qamtamasyz etken.

«Farmatsevtıkalyq jáne tigin tigý kásiporyndarynyń uıymshyl jumysynyń arqasynda medıtsınalyq jáne profılaktıkalyq qorǵaný maskasy táýligine 1 mıllıon danadan astam shyǵarylatyn boldy», - deıdi ol.