«Kitap — dostyq ambassadory» atty is-shara rýhanı qundylyqtardy nasıhattaýǵa baǵyttalyp, kitaptyń qoǵamdy biriktirýshi kúsh retindegi rólin aıqyndady.
Keleli jıyn barysynda otandyq qalamgerler qazirgi kitap naryǵy, oqý mádenıeti jáne ádebıettiń qoǵamdaǵy róli týraly óz kózqarastarymen bólisti. Ádebıetke degen qyzyǵýshylyqty arttyrý, ásirese jastar arasynda kitap oqý mádenıetin qalyptastyrý máseleleri keńinen talqylandy.
Kezdesýge qazaq ádebıetiniń belgili ókilderi qatysty. Olardyń qatarynda aqyn, «Ana tili» ulttyq basylymynyń bas redaktory Erlan Júnis, jazýshy, Qazaqstan Jazýshylar odaǵy basqarma tóraǵasynyń orynbasary Beıbit Sarybaı, prozashy, «Aǵyraptaǵy aty joq adam» romanynyń avtory Qanat Ábilqaıyr, sondaı-aq jazýshy-dramatýrg, «Iesiz kóleńke» romanynyń avtory Álisher Rahat bar.
— Ulttyq kitap kúnine oraı elimizdiń barlyq óńirlerinde aýqymdy is-sharalar ótýde. Osyndaı ataýly kúnde munaıly astana — Atyraýǵa arnaıy kelip, oqyrman qaýymmen júzdesip otyrǵanymyzǵa erekshe qýanyshtymyz, — dedi jazýshy, Qazaqstan Jazýshylar odaǵy basqarmasynyń tóraǵasy Beıbit Sarybaı.
Uıymdastyrýshylardyń aıtýynsha, ádebı kezdesý kitaptyń tek aqparat quraly ǵana emes, qoǵamdy biriktiretin rýhanı kópir ekeni taǵy bir márte dáleldedi. Osyndaı basqosýlar arqyly ádebıetke degen qyzyǵýshylyq artyp, oqyrman men avtor arasyndaǵy baılanys jańa deńgeıge kóterilmek.