Otandyq taýar óndirýshilermen jasalǵan kelisimsharttar artyp keledi – Premer-mınıstr

<p>ASTANA. KAZINFORM &ndash; Búgin elordadaǵy &laquo;Adal azamat. Adal eńbek. Adal bıznes&raquo; forýmynda Premer-mınıstr Oljas Bektenov otandyq taýar óndirýshilerdi qoldaýǵa qatysty pikir aıtty.</p>

«Óńirlerdi aralaǵanda kezde, qýaty 20-30 paıyzǵa ǵana júktelgen zamanaýı jáne básekege qabiletti kásiporyndardy jıi kóremin. Sebebin suraı kele, olardyń memlekettik organdardaǵy, ulttyq kompanııalardaǵy, iri jeke kásiporyndardaǵy konkýrsqa qatysa almaı jatqany málim bolyp jatyr. Biz osy máselemen aınalysyp, qajet birqatar sheshimdi qabyldadyq. Atap aıtqanda, memlekettik satyp alýda qazaqstandyq óndirýshilerden basym tártipte satyp alynatyn taýarlardyń tizimi úsh eseden astam keńeıtildi. Qazir bul tizimge 4500 ónim ataýy endi. Biz qazirdiń ózinde alǵashqy nátıjelerdi kórip otyrmyz. 9 aıdyń qorytyndysy boıynsha otandyq taýar óndirýshilermen jasalǵan kelisimshart somasy 31 paıyzǵa ósip, 167 mlrd teńgeni qurady», - dedi O. Bektenov.

Onyń aıtýynsha, otandyq taýar óndirýshilerdi qoldaý, satyp alý merzimin ońtaılandyrý maqsatynda «Samuryq-Qazyna» qorynyń satyp alý tártibi ózgertildi.

«Otandyq taýar óndirýshilerdi shıkizatpen qamtamasyz etý tetigi zańmen bekitildi. Ol tústi metallýrgııanyń negizgi ónimderi boıynsha qoldanylady. Bul turǵyda tıisti 25 kelisim jasaldy. Qazir bul qadamdar alıýmınıı men mysty ishki óńdeýdi eki esege arttyrýǵa múmkindik berdi», - dedi Úkimet basshysy.

Budan buryn habarlanǵandaı, forým barysynda Premer-mınıstr elge janashyrlyq tanytqan kásipkerlerge alǵys aıtty.

Sonymen qatar ol Úkimet iri bıznestiń aınalasynda shaǵyn jáne orta bıznes beldeýin damytýda eleýli áleýetti kórip otyrǵanyn atap ótti.