Otandyq ónim bola tura, ımporttyq taýarlardy satyp alýdy doǵarý kerek – Oljas Bektenov

<p>ASTANA. KAZINFORM &ndash; Búgin Úkimet otyrysynda Premer-Mınıstr Oljas Bektenov otandyq shıkizat pen materıaldardy paıdalaný boıynsha iri merdiger kompanııalardyń mindettemelerine monıtorıng júrgizýdiń pármendi tetigin ázirleýdi tapsyrdy.</p>

«Jumystar men qyzmetterdiń konkýrsyn jeńip alǵan merdiger kompanııalar qazaqstandyq ónimder bola tura, ımporttyq taýarlardy satyp alýyn jalǵastyryp keledi. Muny doǵarý kerek. Ónerkásip mınıstrligine memlekettik organdarmen jáne uıymdarmen birlesip, otandyq shıkizat pen materıaldardy paıdalaný boıynsha iri merdiger kompanııalardyń mindettemelerine monıtorıng júrgizýdiń pármendi tetigin ázirleýdi tapsyramyn», - dedi Oljas Bektenov.

Úkimet basshysynyń atap ótýinshe, otandyq farmatsevtıka salasyn damytýdyń mańyzy zor.

«Osy jyldyń birinshi jartyjyldyǵynda elimizdiń farmatsevtıka óndirisi 14,5 paıyzǵa ulǵaıdy. Alaıda, saladaǵy áleýet budan áldeqaıda joǵary. Densaýlyq saqtaý mınıstrligine osy kórsetkishti jyl sońyna qaraı odan ári ulǵaıtyp, shyǵarylatyn preparattardyń kólemi men tizbesin keńeıtý jumysyn júrgizýdi tapsyramyn. Sondaı-aq, farmatsevtıka ónimin satyp alýdyń ashyqtyǵyn qamtamasyz etý úshin medıtsınalyq uıymdardyń elektrondyq satyp alý júıesine kóshýin tezdetý qajet», - dedi ol.

Sonymen qatar Premer-Mınıstr búginde munaı-gaz ónerkásibi úshin óndiristiń jańa túrlerin ıgerý boıynsha 65 memorandým bekitilgenine toqtaldy.

«Olardy qazirden bastap ofteık-kelisimsharttarǵa transformatsııalaý qajet. Energetıka mınıstrligi qyrkúıek aıynyń sońyna deıin iri munaı-gaz kompanııalary men qazaqstandyq óndirýshilerdiń arasynda uzaq merzimdi kelisimsharttardyń kepildi túrde jasalýyn qamtamasyz ete otyryp, tıisti jumys júrgizýi qajet», - dei Úkimet basshysy.