Otandyq óndirýshilerge barynsha tapsyrys júktep otyrýǵa tıispiz – Oljas Bektenov

<p>ASTANA. KAZINFORM &ndash; Búgin Úkimet otyrysynda Premer-Mınıstr Oljas Bektenov birinshi orynbasary Roman Sklıardan buǵan deıin bergen tapsyrmalarynyń oryndalý barysyn surady.&nbsp;</p>

«Taýarlar men qyzmetterdi satyp alýdy ulǵaıtý boıynsha kelissózder júrgizý tapsyrylǵan bolatyn. Bul baǵytta qandaı jumys júrgizildi?», - dep surady Oljas Bektenov birinshi orynbasarynan.

Saýalǵa jaýap bergen Roman Sklıar 14 aqpanda 50 iri ónerkásip men ulttyq kompanııa basshylarymen kezdesý ótkizgenin atap ótti.

«Aldaǵy jyldary jańa óndirister qurý, sondaı-aq jergilikti taýarlar men qyzmetterdi satyp alýdy aıtarlyqtaı arttyrý boıynsha naqty mindetter qoıdym. Jalpy, kásiporyndarda qoıylǵan mindetter boıynsha túsinik bar. Mysaly, ERCI kompanııasy qazirdiń ózinde ystyq bekitilgen temir zaýytyn, KAZ Minerals jańa mys balqytý zaýytyn salyp jatyr. Qazfosfat pen Qazazot jańa óndirister esebinen tyńaıtqyshtar shyǵarýdy 2 ese arttyrýdy josparlap otyr. Almaty men Qostanaı óndiristik alańdarynda avtokomponentter óndirisi bastalady. Barlyq kásiporyn 16 naýryzǵa deıin kelesi kezeńge jańa óndiristerdi qurý boıynsha orta merzimdi damý josparlaryn jáne otandyq taýar óndirýshilerdiń ónimderin satyp alýdy arttyrý jóninde jańa baǵdarlamalar usynatyn bolady», - dedi Úkimet basshysynyń birinshi orynbasary.

Osy oraıda Premer-Mınıstr ulttyq ekonomıkany jedel damytý úshin onyń mańyzy zor ekendigin basa aıtty.

«Qazaqstandyq ónimge suranysty arttyrý esebinen aıtarlyqtaı ósý rezervteri bar. Bul belgili. Kásiporyndarmen josparly jáne belsendi jumys nátıjesinde otandyq óndirýshilerge barynsha tapsyrys júktep otyrýǵa tıispiz. Bul máseleni erekshe baqylaýda ustańyz», - dedi Oljas Bektenov.