Otandyq kitap basyp shyǵarý isin sýbsıdııalaý formatyn ózgertý qajet — Aıdos Sarym
«Kitap oqıtyn el qalyptastyrý — Prezıdent aıqyndaǵan kún tártibindegi basymdyqtardyń biri. Bıylǵy Quryltaıda Prezıdent memlekettik basqarýdyń barlyq deńgeıinde keshendi sharalar qabyldaý qajettigin atap kórsetip, kitap oqıtyn el jobasyna qaıta toqtaldy. Memleket basshysynyń osy máselege erekshe nazar aýdarýynyń sebebi — kitap oqý ulttyń damýy men básekege qabilettiliginiń negizgi sharty ekendigimen baılanysty. Bul rette, otandyq avtorlar men baspagerlerdi memlekettik qoldaýda basymdyqtyń oqýlyqtar men ádebıetterdi basyp shyǵarýǵa tapsyrys berýmen ǵana shektelip otyrǵany alańdatady. Búginde dúkenderde kitap sórelerinde ulttyq ádebıet pen kitaptar sany artqanymen, bul jumys tym baıaý júrgizilýde. Sondyqtan Memleket basshysynyń taıaýda ótken Ulttyq quryltaıda osyǵan qatysty bergen tapsyrmasyn negizge ala otyryp, qoldanystaǵy memlekettik baǵdarlamalar men jobalarǵa túzetý engizý qajet dep sanaımyz», — dedi Májilis depýtaty.
Osyǵan oraı Aıdos Sarym atalǵan shara mynadaı baǵyttardy qamtý qajettigin atady:
— otandyq kitap basyp shyǵarý isin sýbsıdııalaý formatyn ózgertý;
— kitap ındýstrııasy men kitapqumarlar qoǵamynyń ınfraqurylymyn qaıta qurý;
— qalalar men aýyldardyń áleýmettik-mádenı standarttaryn ózgertip, oqyrmandar men turǵyndardyń sanyna shaqqandaǵy kitap dúkenderi men dúńgirshekterdiń qajetti kólemin anyqtaý;
— qarapaıym qaǵazdan bastap, polıgrafııalyq jabdyqqa deıin ımportqa júz paıyz táýeldi kitap ındýstrııasy salasyna ekonomıkalyq turǵydan yntalandyrý;
— avtorlyq syıaqy tóleý qaǵıdalaryn, onyń mólsheri men tóleý tártibin ázirleý jáne bekitý;
— kitapqa degen qyzyǵýshylyqty otbasynda qalyptastyrý;
— kitap oqý ádetin mektep qabyrǵasynan bastap damytý;
— mektep kitaphana jelisi boıynsha júıeli jumys júrgizý.
«Prezıdentimiz qoǵamda patrıotızm, jasampazdyq, zańǵa, aǵa býyn degen qurmet sııaqty jáne basqa da qundylyqtardy qalyptastyrý mindetin únemi aıtyp keledi. Buǵan kóbine kitap oqý arqyly ǵana qol jetkizýge bolady. Barlyq memlekettik organdar osyny qaperlerine alýlary qajet. Sovet zamanynda, qazaq jazýshylarynyń týyndylary júzdegen myń tırajben, al eń tanymal qazaq gazet-jornaldary 500-600 myń tırajben taraıtyn kezeńdi de kórdik. Elimiz Táýelsizdigin alyp, halyq sany eselep artqan zamanda bundaı jaǵdaı qaıtalanbaıdy degenniń ózi asqan qatelik! Buǵan tek júıeli, tabandy jumys atqarýymyz shart! Jalpy alǵanda, fraktsııamyzdyń depýtattary óz tarapynan qajetti zańnamalyq sharalar arqyly otandyq kitap shyǵarýdy ınstıtýtsıonaldyq turǵydan nyǵaıtý úshin Úkimetke járdem kórsetýge daıyn Osylaısha, Memleket basshysynyń tapsyrmasy tolyqqandy iske asyrylýy kerek», — dedi Aıdos Sarym.