Kartop endi shirimeıdi: PepsiSo jergilikti kókónisti kádege jaratýǵa nıetti

<p>ASTANA. KAZINFORM &ndash; Bıyl Almaty oblysy Alataý qalasynda qurylysy bastalatyn &laquo;Lays&raquo; brendti jeńil taǵamdar óndiretin zaýytqa áý basta kókónistiń 50 paıyzy qazaqstandyq fermerlerden jetkizilmek. Al 2033 jyly 100 paıyz otandyq sharýalardyń kartoby qoldanylady.</p>

Bul týraly Astanada ótken zaýyt jobasynyń tanystyrylymy rásiminde Reseı, Belarýs, Kavkaz, Ortalyq Azııa elderindegi PepsiSo azyq-túlik ónerkásibi salasyndaǵy iri transulttyq korporatsııasynyń prezıdenti Davıd Manzını aıtty.

«Zaýyttyń qurylysyn 2026 jyly aıaqtaýdy kózdep otyrmyz. Búginde jer telimi sııaqty negizgi máseleler sheshimin tapty. Bul rette, barynsha qoldaý kórsetken qazaqstandyq bılik ókilderine alǵysymdy bildiremin. Zaýyt sátti iske qosylsa, Ortalyq Azııadaǵy eń iri jobamyz bolmaq. Ónimder Ortalyq Azııa elderimen qatar, TMD elderine eksporttalatyn bolady. Eń bastysy, 350-ge jýyq jańa jumys orny ashylady. Ózge de áleýmettik jobalarymyz bar», - dedi D. Manzını.

Belgili bolǵandaı, snekter shyǵaratyn jańa zaýyttyń qurylysyna 70 mlrd teńge ınvestıtsııa tartylmaq. QR Syrtqy ister mınıstrligi Investıtsııa komıtetiniń tóraǵasy Ǵabıdolla Ospanqulovtyń aıtýynsha, atalǵan joba jaıly alǵash ret 2022 jyly QR Prezıdenti qasym-Jomart Toqaevtyń AQSh-qa jasaǵan is-sapary barysynda aıtylǵan.

Foto: KAZAKH INVEST

«Sol jyly amerıkalyq ınvestorlarmen bolǵan kezdesýde ýaǵdalasqan sharttar búgin júzege asyp jatyr deýge tolyq negiz bar. Atalǵan iri transulttyq kompanııa Ortalyq Azııadaǵy shtab páteri retinde Qazaqstandy tańdap otyr. Barlyq kelisimsharttarǵa qol qoıyldy. Alataý qalasyndaǵy arnaıy ekonomıkalyq aımaǵyna osyndaı iri kompanııalardyń kelýi elimizdegi ınvestıtsııalyq klımattyń jaqsarǵanyn, ınvestorlarǵa árdaıym Úkimet tarapynan zor qoldaý baryn kórsetedi», - dedi Ǵabıdolla Ospanqulov.

Atalǵan jobanyń azyq-túlik ónerkásibi men AÓK úshin mańyzdylyǵymen qatar, zaýyt qurylysy irgeles kólik, logıstıka, aýyl sharýashylyǵy ónimderin qaptaý jáne qaıta óńdeý salalaryna mýltıplıkatıvti áser etetinin atap ótken jón.

Esterińizge salsaq, buǵan deıin Premer-Mınıstr Oljas Bektenov Reseı, Belarýs, Kavkaz, Ortalyq Azııa elderindegi PepsiSo azyq-túlik ónerkásibi salasyndaǵy iri transulttyq korporatsııasynyń prezıdenti Davıd Manzınımen kezdeskenin jazǵan edik.