«Otandastar» qorynyń jyldyq bıýdjeti qansha

ASTANA. QazAqparat – «Otandastar qory» kommertsııalyq emes aktsıonerlik qoǵamynyń janyndaǵy qoǵamdyq komıssııanyń otyrysynda qordyń 2022 jylǵy bıýdjeti qansha ekeni málim boldy, dep habarlaıdy QazAqparat tilshisi.

«Qordyń jyldyq bıýdjeti qansha? Byltyrǵydan azaıdy ma, kóbeıdi me? Jalpy qordyń shtatynda neshe adam jumys isteıdi?» dep surady komıssııanyń múshesi, qoǵam qaıratkeri Aýyt Muqıbek.

Qoǵamdyq komıssııanyń tóraǵasy, senator Murat Baqtııarulynyń aıtýyna qaraǵanda, bıylǵy bıýdjet byltyrǵydan az bolyp otyr.

«2022 jyly «Otandastar» qorynyń bıýdjeti 650 mln teńge bolyp belgilengen. Jalpy shtatta 33 adam jumys isteıdi. Onyń ishine Dúnıejúzi qazaqtary qaýymdastyǵynyń shtaty da kiredi. Shtattaǵy qyzmetkerler arasynda shetelden otanǵa qonys aýdarǵan eki azamat bar. Jalpy qordyń dırektorlar keńesiniń quramynda qandas otandastarymyz da bar. Sonyń biri – kásipker Syrymbek Taý», - dedi «Otandastar qorynyń» prezıdenti Abzal Saparbekuly.