«Otandastar qory» arystyqtarǵa kómek kórsetti
«Otandastar qory» KEAQ jáne «Dúnıejúzilik qazaqtar qaýymdastyǵy» RQB ujymy Arys qalasyndaǵy jarylystar kezinde zardap shekken otandastarymyzǵa bir kúndik jalaqysyn aýdardy.
«Sheteldegi qandastarymyz da Arystaǵy aýyr jaǵdaıǵa baılanysty óz alańdaýshylyqtaryn bildirip, jedel hattar jiberip, qaıyrymdylyq kómekterin kórsetip jatyr. Elimizdiń ár oblystaryndaǵy shetelden kelgen qandastarymyz da aıanyp qalǵan joq. Solardyń biri, Nur-Sultan qalasynda turyp jatqan Qytaıdan oralǵan qandastarymyz, prodıýsser Erbosyn Nurmuhan, kásipkerler Qızat Kárimuly, Bilál Ysqaq qatarly atqa miner azamattar bas qosyp, Atajurtqa oralǵan aǵaıyndardy jumyldyryp, alǵashqy kómekterin «Qahan Astana» kompanııasy atynan Arysqa jóneltti. Atalǵan azamattar buǵan deıin de kóptegen qoǵamdyq is-sharalardyń basy qasynda júrip, qoldaý kórsetip keledi», -delingen habarlamada.