Otan úshin ot keship, urpaq úshin janyn pıda etýge daıyn bolǵan ardagerlerdi qurmetteý - paryzymyz - QazUTÝ rektory

ALMATY. Mamyrdyń 5-i. QazAqparat /Názıra Eleýhan/ - Búgin Almatyda Sátbaev atyndaǵy Qazaq Ulttyq tehnıkalyq ýnıversıtetinde Uly Jeńistiń 65 jyldyǵyna arnalǵan birneshe saltanatty sharalar ótti,

dep habarlaıdy QazAqparat.

Sharaǵa Uly Otan soǵysynyń ardagerleri men tyl ardagerleri jáne aýǵan soǵysynyń ardagerleri shaqyrylǵan. Ashylý saltanaty QazUTÝ mańyndaǵy Dańq memorıalyna gúl shoǵyn qoıýmen jáne osy oqý ornynda soǵystan keıin 50 jyldan asa ýaqyt ustazdyq etken ardagerler Qurmanǵalıev Meıram men Batyrbekov Mushtaıdyń qurmetine arnalǵan memorıaldyq taqtanyń ashylýymen bastaldy.

«Jeńistiń 65 jyldyǵy - tarıhymyzdaǵy aıtýly kún. Osy merekege oraı, búgingi sharany qurmetti ardagerlerimizdi ulyqtaý, ardaqtaý jáne dúnıeden ótken jaýyngerlerdi eske alý maqsatynda ótkizip jatyrmyz. Biz ardagerlerimizdiń erligin esh ýaqytta umytpaýymyz kerek. Otan úshin ot keship, urpaq úshin janyn pıda etýge daıyn bolǵan ardagerlerdi qurmetteý bizdiń paryzymyz», dedi QazUTÝ rektory Jeksenbek Ádilov. Onyń aıtýynsha, QazUTÝ tiziminde 13 soǵys ardageri men 56 eńbek maıdanyna qatysýshylar bar. "Onyń ekeýi bizdiń oqý ornynda áli kúnge deıin jumys isteýde. Olar professor Dosmuhamed Shybekov pen dotsent Natan Rehson. Olardyń ómiri jastarǵa, jas urpaqqa úlgi bolarlyq ómir, dep atap ótti Jeksenbek Ádilov.

Shara barysynda ardagerlerdiń 15-i - «Qurmetti túlek», 5-eýi - «Aıryqsha eńbegi úshin», 32-si - «QazUTÝ Ardageri», 26-sy «Úzdik túlek» tósbelgilerimen marapattaldy. Olardyń qurmetine merekelik dastarhan jaıylyp, barlyǵyna qarjylaı jáne arnaıy daıyndalǵan syılyqtar tabystaldy. Merekelik shara kontserttik baǵdarlamamen jalǵasty.