Otan qorǵaýshylar kúni aqtóbelik áskerı qyzmetkerler baspanaly boldy
Minsiz qyzmet etken áskerı qyzmetkerler mereke kúni 1, 2, 3 dárejeli medaldarmen marapattaldy, dep habarlaıdy QazAqparat tilshisi.
Aqtóbe qalasyndaǵy №6655 áskerı bólimi búgin Otan qorǵaýshylar kúnine jiti daıyndalǵan. Sarbazdar sap túzedi, áskerı qyzmetkerler óz jumysy men áskerı tehnıkany, qarý-jaraq pen arnaıy kıimderiniń qyr-syryn túsindirdi. №6655 áskerı bólimi shtab bastyǵynyń aǵa kómekshisi Baýyrjan Nuǵmanovtyń aıtýynsha, úıretilgen ıtter esirtki, jarylǵysh zat izdeıdi, kúzetedi. Máselen, ótken jyly eki qylmystyń izi sýymaı ashylyp, ruqsat etilmegen zattar tasymaldaýdyń úsh deregi anyqtaldy.
Otan qorǵaýshylardy oblys ákimi Berdibek Saparbaev quttyqtady. Beıbit zamannyń búgingi batyrlaryna alǵysyn aıtty.
«Sizderdiń erlikterińiz ben qyraǵylyqtaryńyzdyń arqasynda Qazaqstan beıbit zamanda ómir súrip jatyr. Qazaqstandyqtar bolashaǵy týraly úreılenbeı, tańerteń esh ýaıymsyz jumysqa baryp júr. Ár azamattyń mindeti óz Otanyn qorǵaý, súıý, Otan aldynda azamattyq boryshyn óteý. Al sizder Aqtóbe halqynyń tynyshtyǵyn kúzetip, jaıly ómir úshin úles qosyp kelesizder»,- dedi oblys ákimi Berdibek Saparbaev.
Búgingi №6655 áskerı bóliminiń úsh qyzmetkeri baspanaly boldy. Olar №6655 áskerı bóliminiń qyzmetkerleri Jandos Jumaǵulov, Almas Musabekov jáne Denıs Cha. Áskerı qyzmetker Denıs Cha Aqtóbege Petropavl qalasynan kelgen. Bir aı boıy páter jaldap, eki balasymen kóship-qonyp júrgen №6655 áskerı bólimi komandıriniń orynbasary búgin qos merekeni atap ótti.
«Aqtóbe óte keremet óńir. Men Petropavl áskerı ınstıtýtynda bilim alyp, Qyzylorda, Astana, Qaraǵandy qalalarynda jumys istedim. Qazir Aqtóbege qonys aýdardym. Páterli bolyp, mereke kúni qos qýanyshty atap ótip jatyrmyz»,- dedi Denıs Cha. Sonymen qatar, Otan qorǵaýshylar kúni aqtóbelik áskerı qyzmetkerler Prezıdent Jarlyǵymen minsiz qyzmeti úshin 1, 2, 3 dárejeli medaldarmen marapattaldy. Oblys ákimi qarýly kúshterdiń qurylǵanyna 25 jyl tolýyna oraı azamattardyń qaýipsizdigi men tártipti nyǵaıtýdaǵy qyzmeti úshin alǵys hat berdi. Al Uly Otan soǵysynyń ardageri Ótesh Jalmaǵambetov áskerı qyzmetkerler men jas sarbazdardy merekemen quttyqtap, olardyń baqytty urpaq ekenin eske saldy.
Merekelik shara kezinde alty aı buryn áskerge shaqyrylyp, jaýyngerlik jattyǵýdy meńgergen jas sarbazdar sapta turý, júrý, qarý ustaý ádisterin kórsetti.