Otan qorǵaýshy kúni ekenin jubaılarymyzdyń esine salmasaq umytyp ketedi - Elbasy ázili

ASTANA. QazAqparat - Búgin Aqordada birqatar tulǵalarǵa joǵary áskerı jáne arnaýly ataqtar, synyptyq shender jáne biliktilik synybyn tabystaǵan Elbasy Nursultan Nazarbaev olardy aldaǵy Otan qorǵaýshy kúni merekesimen quttyqtady, dep habarlaıdy QazAqparat tilshisi.

«Qazaqstannyń Otan qorǵaýshy kúni dep 7 mamyrdy atadyq. 1992 jyly dál osy kúni qazaqtyń Qarýly Kúshterin qurý týraly Jarlyqqa qol qoıǵan bolatynmyn. Sondyqtan er-azamattardy, Otan qorǵaýshylardy bizdiń jubaılarymyzdyń, ata-analarymyzdyń quttyqtaıtyn kúni dál sol kún. Esine sala bermesek, keıde umytyp ketedi», - dep ázildedi Nursultan Nazarbaev.

Memleket basshysy ómirin áskerı qyzmetke arnap, jas kezinen bilim alyp, oqyp, temirteı tártipke múltiksiz baǵynatyn azamattardy kele jatqan merekelerimen quttyqtady.

«Osyndaı eńbektiń arqasynda eń joǵary general ataǵyn alý úlken qýanysh dep bilemin. Osy qýanyshtaryńyz qutty bolsyn! Sizderdi, januıalaryńyzdy, birge istegen jora-joldastaryńyzdy quttyqtaımyn!», - dedi Nursultan Nazarbaev.

Qazaqstan Prezıdenti kelesi kezekte búgingi álemniń qubylmaly ekendigin basa aıtty.

«Erteń, odan ary kúni ne bolaryn eshkim de bilmeıdi. Degenmen, oq-dárini qurǵaq ustap, barlyq ýaqytta ázir bolý, Otanyń men jeriń úshin kez kelgen ýaqytta janyńdy pıda etýge daıyn bolý qajet. Biz, barlyq er-azamattar sol úshin dúnıege keldik jáne sol úshin ómir súremiz. Eger adamǵa ómir beriletin bolsa, birde ol ómir adammen qosh aıtysady. Biz onyń qaıda, qashan bolaryn bilmeımiz. Barlyq ýaqytta da jaýyngerler Otanyn qorǵaý jolynda janyn pıda etýdi ózderiniń basty paryzy sanaǵan. Bul qarapaıym sóz emes», - dep atap ótti QR Prezıdenti.