Otan qorǵaýdan asqan bıik maqsat joq – podpolkovnık Ómirjan Sahatov
- Ómirjan Tóleshuly, Otan qorǵaýdan bıik maqsat joq. Osyǵan baılanysty ne aıtar edińiz?
- Áskerı qyzmet júregi Otanym dep soǵatyn kez kelgen jigittiń ómirindegi mańyzdy kezeń der edim. Eli men jerin qorǵaý – ár azamattyń qasıetti boryshy. Memlekettiń qorǵanys qabiletin arttyrý Qazaqstandaǵy strategııalyq maqsattyń biri ekendigi málim. Óıtkeni árbir áskerı qurylym – el egemendiginiń tiregi, tutastyǵynyń jarqyn kepili, halqymyzdyń erteńgi kúnge degen senimi de osy arqyly bekı túsedi desek, esh artyq aıtqandyq emes. Sol sebepti ár azamat Otan qorǵaýdy abyroıly mindet retinde sezinip, el aldynda bergen antyna adal bolyp, bıik shyńdardy baǵyndyra bilgeni abzal. Qazirgi tańda memleketimizde 18-27 jas aralyǵyndaǵy densaýlyǵy jaramdy jigitter áskerı boryshyn óteýi tıis. Osy oraıda Otan otbasynan bastalady demekshi, ár ata-ana elin qorǵaýdyń uly is ekendigin balasynyń qulaǵyna kishkentaıynan quıyp otyrsa, ol sony tereń uǵyna túsedi.
- Endi sizdiń áskerı bólimniń tynys-tirshiligi týraly áńgimelep berseńiz?
- Bizdiń áskerı bólimde shamamen 400-ge jýyq sarbaz qyzmet atqarady. Olar kıim-keshekpen, arnaıy quraldarmen, qarý-jaraqpen qamtamasyz etilgen. Qazirgi kezde barlyǵy beriledi, qyzmetin oıdaǵydaı atqarýǵa esh kedergi joq. Tańǵy saǵat 06.00-den keshki 22.00-ge deıin qyzmette bolyp, sodan keıin 8 saǵat uıyqtaıdy. Sarbazdar kúnine úsh ret tamaqtanady.
- Sonda Ulttyq ulan jaýyngerleri kúndelikti qandaı qyzmetpen aınalysady?
- Ulttyq ulannyń tapsyrmalaryna sáıkes jaýyngerlik mindetterin atqarady. Sonyń ishinde Oral qalasynyń kóshelerinde qoǵamdyq tártipti saqtaýǵa atsalysady. Sondaı-aq eki túzetý mekemesin kúzetemiz. Odan bólek jeke quramnyń jaýyngerlik daıyndyǵyn shyńdaý úshin sabaqtar men jattyǵýlar ótkiziledi.
- Áskerı boryshyn óteýge kelgen sarbazdar aýyryp qalsa, qaıda emdeledi?
- Ózimizdiń bólimde medıtsınalyq lazaret bar. Oǵan qosa qaladaǵy emhanalarmen kelisim jasalǵan. Soǵan baılanysty aýrýhanalarda tegin emdeledi.
- Bólimde kóbine qaı oblystardyń ókilderi qyzmet etýde?
- Árıne, aldymen Batys Qazaqstan oblysyn aıtar edik. Sondaı-aq Atyraý, Aqtóbe, Mańǵystaý, Almaty, Túrkistan óńirlerinen kóp keledi. Bizdiń mindet – olardyń áskerı bilim-biligin arttyryp, densaýlyǵyn shyńdap, elderine aman-esen qaıtarý.
- Ata-analarymen baılanys qalaı?
- Vzvod komandırleri ortaq chatta únemi habarlasyp otyrady. Oǵan qosa demalys kúnderi sarbazdar ata-analaryna qońyraý shalyp, amandyǵyn bildiredi.
- Bólimde áskerı tártip jaǵy qalaı, álimjettik sııaqty derekter tirkelgen joq pa?
- Áskerı tártip oıdaǵydaı dep aıtýǵa bolady. Áskerı bólim aýmaǵynda, rotalarda beınekameralar ornatylǵan, bári baqylaýda ustalady. Árıne, jaýyngerlik qyzmettiń óz qıyndyqtary bar, oǵan kóndigip, úırenip ketý ońaıǵa túspeıdi. Biraq bizde álimjettik boıynsha derekter tirkelgen joq. Batys Qazaqstan oblysy boıynsha sarbaz analarynyń óz uıymy bar. Tóraıymy Gúlsim Salyqqyzy kez kelgen ýaqytta áskerı bólim aýmaǵyna ruqsat qaǵazymen kirip, sarbazdarmen tildese alady. Olardyń hal-jaǵdaıyn bilip, ata-analaryna habarlap otyrady.
- Bıylǵy sý tasqyny kezinde Ulttyq ulan jaýyngerleri de kóppen birge tize qosyp, uıymshyldyqpen eńbek etti. Bul jóninde ne aıtar edińiz?
- Iá, sý tasqyny bastalǵan 26 naýryzdan bastap 380 sarbaz bógetterdi bıiktetý, qapshyqtardy toltyryp, tóseý isterine atsalysty. Kúni búgin jedel maqsattaǵy batalonnan 80 jaýynger №1, 2, 3-saıajaılar jáne «Samal» shaǵynaýdanynda jaıaý júrip, óz qyzmetterin atqarýda. ıAǵnı olar oqys oqıǵa bolmas úshin sý basqan saıajaılardy kúzetip, turǵyndardy saqtandyrady, qaýipti jerlerge jibermeıdi.
- Áskerde komandırdiń jeke bas úlgisi erekshe ról atqaratyny belgili. Osyǵan oraı ózińiz de soǵan saı bolýǵa umtylasyz ǵoı?
- Álbette, solaı! Basqasha bolýy múmkin emes. Óıtkeni qatardaǵy sarbazdar komandırlerge qarap boı túzeıdi. Solardaı bolǵysy kelip, ózderin soǵan beıimdeıdi.
- Al úlgili jaýyngerler úshin qandaı jeńildikter qarastyrylǵan?
- Bólinis komandırleri ár sarbazdyń teorııalyq bilimine jáne dene daıyndyǵyna baǵa berip otyrady. Eń bastysy, úzdikterge qyzmettik minezdeme men joldama jáne sertıfıkat berilip, sonyń negizinde olar joǵary áskerı oqý oryndaryna UBT tapsyrmaı-aq túse alady. Ótken jyly 28 sarbaz óz óńirlerindegi osyndaı oqý oryndaryna tústi. Sonymen qatar áskerı boryshyn ótegender ishki ister jáne UQK organdaryna qyzmetke kire alady.
- Ózińiz qaı aımaqtyń týmasy bolasyz?
- Men Soltústik Qazaqstan oblysy Shal aqyn aýdany Qaratal aýylynda týyp-óstim. 2002 jyly mektep bitirgennen keıin Petropavl qalasyndaǵy joǵary áskerı ýchılışesine oqýǵa tústim. Osyǵan deıin Kókshetaý qalasynda «Ortalyq» óńirlik qolbasshylyǵyna qarasy 5510-áskerı bóliminde shtab bastyǵy boldym. Oralǵa bıylǵy aqpanda qyzmetke keldim. Zaıybym Gúlnármen birge Dııar, Damır jáne Safııa esimdi úsh ul-qyzymyzdy tárbıelep otyrmyz. Olardyń da elin súıetin patrıot bolyp óskenin qalaımyz.
- Áńgimeńizge rahmet, mereke qutty bolsyn!
Eske sala keteıik, budan buryn bóget salýda Ulttyq ulan jaýyngerleriniń 1 mln qum toltyrylǵan qap daıyndaǵanyn jazǵan bolatynbyz.