Otan qorǵaý – abyroıly borysh - polkovnık Erden Balǵymbaev

ORAL. QazAqparat – QR Ulttyq ulany «Batys» óńirlik qolbasshylyǵyna qarasty 5517 áskerı bóliminde Otan qorǵaýshylar kúni men Jeńistiń 78 jyldyǵy keń kólemde atalyp ótti, dep habarlaıdy QazAqparat tilshisi.

«Ashyq esik» kúninde áskerı tehnıkalar men qazirgi zamanǵy qarý-jaraq túrleriniń úlgileri men sarbazdar kıimderi kórsetildi.

Merekelik is-sharaǵa arnaıy kelgen oblys ákimi Narıman Tóreǵalıev áskerı qyzmetshiler men sarbazdardy Otan qorǵaýshylar kúnimen quttyqtap, ıgi tilegin bildirdi.

Óńir basshysy aǵa býyn ókilderiniń Ekinshi dúnıejúzilik soǵys kezinde teńdessiz erlik kórsetip, odan keıingi jyldary beıbitshilik úshin kúreskenin, memleket múddesin qorǵap, shekara shebin kúzetkenin, qazirgi tańda jas urpaqqa otanshyldyq rýhta tárbıe berýge óz úlesterin qosyp kele jatqanyn atap ótti.

Іs-shara barysynda ardagerler men sala úzdikterine marapattar tabys etildi.

«Minsiz qyzmeti úshin» tósbelgisimen marapattalǵandar arasynda «Batys» óńirlik qolbasshylyǵy tárbıe jáne áleýmettik-quqyqtyq jumys basqarmasynyń bastyǵy, polkovnık Erden Balǵymbaev bar. Ol shırek ǵasyr boıy áskerı salada qyzmet atqaryp keledi.

«Meniń barlyq ómirim áskerı qyzmetpen baılanysty. Bala kezimnen áskerı qyzmetshi bolýdy armandap edim, sol maqsatyma jettim. Ár sardardyń, ár sarbazdyń boryshy – Otanǵa adal qyzmet etý. Otan qorǵaýshylar kúnine oraı qyzmettesterimniń bárine sáttilik, baqyt pen tabys tileımin», - dedi polkovnık E. Balǵymbaev.

Meımandar «Batys» óńirlik qolbasshylyǵynyń murajaıynda bolyp, sondaı-aq sarbaz botqasynan dám tatty. Dastarhan basynda maıdan ánderi oryndaldy.

Sodan keıin áskerı sherý merekelik kontsertke ulasty.

Eske sala keteıik, budan buryn BQO-da Jeńis kúnine oraı 5 myńnan astam adamǵa materıaldyq kómek kórsetilgenin jazǵan bolatynbyz.