Osydan 16-17 jyl buryn kezekke turǵan tarazdyqtarǵa jer telimderi berilmek

NUR-SULTAN. QazAqparat – Tarazda 2005-2006 jyldardan beri jeke turǵyn úı salý úshin kezekte turǵandarǵa jer telimderin berý protsesi bastaldy. Bul týraly Jambyl oblysynyń ákimi Nurjan Nurjigitovtiń tóraǵalyǵymen qalanyń bas jospary talqylanǵan keńeste málim boldy, dep habarlaıdy QazAqparat óńir basshysynyń baspasóz qyzmetine silteme jasap.

Tarazda jeke turǵyn úı qurylysyn júrgizý úshin jer kezeginde turǵandardyń jalpy sany – 102 925. «Jer ýchaskesin alý úshin kezekke qoıý» memlekettik qyzmeti avtomattandyrylǵannan keıingi 1 aıdyń ózinde 30 myńǵa jýyq azamat tirkelip úlgergen.

Qalalyq jer qatynastary bóliminiń basshysy Berkinbek Bıjigitovtiń aıtýynsha, «Qarasý» (Qumshaǵal) alqabyna ınfraqurylym júrgizilip, jer telimderin (1460) bólý jumystary bastaldy.

«Kezektiń basyndaǵy 4477 adamǵa habarlandyrý qaǵazy jiberildi. 2005 jyly kezekke turǵandar tolyǵymen jáne 2006 jyldyń 30 maýsymyna deıin tirkelgen azamattar qamtyldy», - delingen málimdemede.

Sondaı-aq, qaladaǵy «Ortalyq bazarǵa» qarama-qarsy 312 ga jýyq jer telimin memleket qajettiligi úshin qaıtaryp alý jumystary da qolǵa alynǵan.

«Jer telimderi alynǵan soń qurylys bólimi ınfraqurylym júrgizý jumystaryn atqarmaq. Osy jer telimderi jeke turǵyn úı qurylysy úshin jer kezegindegi azamattarǵa beriletin bolady», - dep tolyqtyrady baspasóz qyzmeti.

«Biz Taraz qalasynyń bas josparyn qaraǵan kezde ózindik kózqarasymyzdy qalyptastyrýǵa nazar aýdarýymyz kerek. Shahardyń tarıhı kelbeti, dızaın-kody saqtalýy tıis. Bul baǵytta naqty júıe qajet. Qalanyń ishki jáne syrtqy bólikteri sol júıe negizinde damyp otyrǵany durys. Sondaı-aq, biz aldaǵy úsh jylda qandaı jumystar atqaramyz, qandaı qurylys salyp, ınfraqurylym júıelerin tartamyz? Sony da naqtylap josparlaý kerek», - deıdi oblys ákimi Nurjan Nurjigitov.

Óńir basshysy Baızaq jáne Jambyl aýdandarynyń qala irgesindegi birqatar aýmaqtaryn oblys ortalyǵyna qosý josparynyń oryndalý barysyna aıryqsha nazar aýdaryp, odan týyndaıtyn áleýmettik máselelerdi sheshý jolyn búginnen pysyqtaýdy tapsyrdy.

Eske salsaq, memleketten jeke turǵyn úı salý úshin tegin alǵan 10 sotyq jer úı salýǵa jaramsyz bolsa, qaıta kezekke turýǵa bolatyny habarlanǵan bolatyn.