Osy kúzde 17 myń azamat Otan aldyndaǵy boryshyn óteýge attanady
«Qazaqstan armııasy búginde áskerge shaqyrý jáne kelisimshart boıynsha aralas tásilmen jasaqtalady. Onyń is-qımylynyń bar salasyna álemdik tájirıbege negizdelgen eń ozyq tájirıbeler engizilgen. Jeke qurammen jasaqtaý, onyń ishinde áskerge shaqyrý da artta qalǵan joq. Qyrkúıek aıynda áskerge kezekti ret shaqyrý bastaldy. Kúzgi shaqyrylym jeltoqsan aıyna deıin sozylady. Jeltoqsanǵa deıin biz 17 myńnan astam jastardy ásker qataryna shaqyrýymyz kerek. Onyń ishinde Qarýly kúshter qataryna, Shekara qyzmetine, Ulttyq Ulanǵa jáne Memlekettik kúzet qyzmetine shaqyramyz», - dedi OKQ-da ótken baspasóz máslıhatynda Qarýly Kúshter Bas shtabynyń uıymdastyrý jáne jumyldyrý jumystary jónindegi departamenti bastyǵynyń mindetin atqarýshy Ardaq Kýkatov.
Onyń aıtýynsha, ásker qataryna densaýlyǵy myqty, eldiń saıasatyn qoldaıtyn, patrıottyq sana-sezimi joǵary, psıhologııalyq-moraldyq jaǵdaıy jaqsy er azamattar qabyldanady.
Áskerı bólimder boıynsha shaqyrylýshylardy irikteý jáne bólý kezinde aldyn ala zertteý nátıjeleri jáne shaqyrylýǵa deıingi alǵan mamandyqtary eskeriledi. Áskerı bólimderdi jasaqtaý eksaýmaqtyq qaǵıdat boıynsha júzege asyrylady. Shaqyrýdy jáne medıtsınalyq kýálandyrýdy júrgizý tártibi týraly máselelerdi jedel sheshý úshin QR Qorǵanys mınıstrliginde «qaýyrt jeli» jumys isteıdi. Jelide jaýapty laýazymdy adamdar túsinikteme berip, azamattardy qyzyqtyratyn barlyq saýaldarǵa jaýap beredi.