«Osy bizde namys bar ma?» - baspasózge sholý

ASTANA. 19 qarasha. QazAqparat - «QazAqparat» agenttigi respýblıkalyq basylymdarda 19 qarasha, seısenbi kúni shyqqan ózekti materıaldarǵa sholýdy usynady.

*** «Bir nársege mıym jetpeı-aq qoıdy. Elimizdegi baz bireýler Grıgorıı kúntizbesi boıynsha jańa jyl týysymen kelesi jańa jyldy (Naýryzdy emes) taǵatsyzdana kútetin sııaqty. Bul rette, ásirese, Astana aldyna eshkimdi salar emes. Ótken jyly jeltoqsan týar-týmasta jańa jyl qarbalasyna kirisip ketse, bıyl Eýropańdy da, Amerıkańdy da, taǵy kimiń bar, bárin artqa tastap, qarashanyń bel ortasynda, qar qylaýlamaı jatyp, jasyl shyrsha tige bastady. Qazir qalanyń qaı buryshyna barsań da abyr-sabyr, álem-jálem. Jurt bir nárseden qur qalatyndaı jantalasyp jatyr. ıApyrm-aý, bul ne? Bizdegiler ýaqytty aýystyryp alǵannan saý ma ózi?! Álde jańa jylǵa daıyndyqty eki aı buryn bastaý birjola saltymyzǵa sińip, dástúrimizge enip ketkeni me?» - dep jazady «Egemen Qazaqstan» búgingi sanyndaǵy «Osy bizde namys bar ma?» degen maqalasynda. Bas basylymda «Kort kerbezi» atty maqala jarııalandy. Astanada áıelder arasynda ITF týrnıriniń kezekti jarysy ótip, onda Qazaqstannyń jas tennısshisi Kámıla Kerimbaeva jeńimpaz atandy. Osyǵan oraı Memleket basshysy Nursultan Nazarbaev ony telefon arqyly jeńisimen quttyqtady. ITF týrnıri - halyqaralyq tennıster qaýymdastyǵynyń (WTA) qamqorlyǵymen áıelder arasynda ótetin úlken jarystardyń biri. Ol jas tennısshilerdiń bolashaqta WTA-nyń úlken týrnırlerine qatysýy úshin ótkiziledi. Osy synda Kámıla Kerimbaeva alǵash ret úlken jetistigine jetti. Ol Astanada ótken týrnırde ózbek tennısshisi Albına Habıbýlınany eki partııada 6:1, 6:3 esepterimen utty. Buǵan deıin Kámıla óz elimizde úlken halyqaralyq jarystarda mundaı bıik tuǵyrǵa kóterilgen emes edi. Sondyqtan, muny onyń ómirindegi eń joǵary nátıje deýge bolady. *** «Aıqyn» gazetiniń jazýynsha, Májiliste ótken keshegi «Úkimet saǵatynda» eldi eleń etkizerlik birneshe jańalyq aıtyldy. Birinshiden, aldaǵy jyldary «Qazaqstanda jasalǵan» avtokólikterdiń baǵasy arzandaýy múmkin, Indýstrııa mınıstriniń birinshi orynbasary A.Raý muny joqqa shyǵarmady. Ekinshiden, alda Astana, Almaty jáne basqa da iri qalalardaǵy kósheler kólikten bosap qalýy ǵajap emes! Óıtkeni el Úkimeti eki mıllıonnan astam kólikti joıý jolyn qarastyratyn bolady. Osy kúni, sondaı-aq Dúnıejúzilik saýda uıymyna kirý aıasyndaǵy aýyl sharýashylyǵy boıynsha kelissózderdiń qupııaǵa aınaldyrylǵandyǵy málim boldy. Qazaqstan jıyrma jylǵa jýyq ýaqyt boıy DSU esigin qaǵyp tur. Buryn bul habardy úreımen qabyldaıtyn halyq endi jalyǵa bastaǵandaı. Onyń ústine bul jahandyq uıymǵa elimizdiń naqty qashan kiretindigi qaıtadan belgisiz bolyp qalǵan kórinedi. Osyny baıqaǵan, ári 11 qazandaǵy Úkimettiń keńeıtilgen otyrysynda Elbasynyń kelissózshilerdi synaǵanyn estigen Senat pen Májilistiń depýtattary «bas kelissózshini» kezek-kezek shaqyryp, suraqty qarsha boratty. «Árıne, Keden odaǵy jáne keleshektegi «Eýrazııalyq odaq» boıynsha kelissózderdi qatar alyp júrgendikten, Ekonomıkalyq ıntegratsııa isteri mınıstri Janar Aıtjanovaǵa qalaýlylar «qos slavıan, bir túrki» eliniń birlestigine qatysty saýaldardy da qosa qoıdy. «Solar birigip alyp, bizdiń múddemizdi aıaqasty etip jatqan joq pa?» dep ashyǵyn surady depýtattar. Rasynda, ondaı talaptar joq emes desedi. Mysalǵa, Qazaqstan sheteldiń úzdik tehnologııaly ozyq kombaındaryn ákeleıin dese, Belarýs pen Reseı tize qosyp, oǵan tospa qoıyp tastapty!» - dep jazady basylym «2,5 mıllıon kólik qaıda ketedi» degen maqalasynda. Osy basylymda «Prezıdent syny serpin berdi» degen maqala kópshilik nazaryna usynylyp otyr. El turǵyndarynyń 97 paıyzy Elbasy Nursultan Nazarbaev ústimizdegi jyly 11 qazanda Úkimettiń keńeıtilgen jıynynda sheneýnikterdi synaǵan soń atqarýshy bılik qyzmetterin anaǵurlym jandandyra bastaǵanyn atap kórsetti. Bul osy jyldyń 9 -14 qarashasy aralyǵynda Áleýmettik-saıası zertteýler ınstıtýtynyń mamandary júrgizgen suraq-jaýap barysynda anyqtaldy. Instıtýt mamandary júrgizgen suraq-jaýapqa elimizdiń 14 oblysy men eki qalasynyń (Astana jáne Almaty) turǵyndary qatysty. Eger eske sala ketsek, sol jıynda Elbasy jergilikti jerlerdegi jáne sondaı-aq, ortalyqtaǵy atqarýshy bıliktiń turǵyndardyń ómirinde týyndaıtyn asa mańyzdy problemalarǵa atústi qaraıtynyn, tipti kóńil bólmeıtinin ashyq aıtqan-dy. Suraq-jaýap barysynda anyqtalǵan bir jáıt, oǵan qatysýshylardyń 97 paıyzy Elbasynyń Úkimet pen jergilikti atqarýshy organdarǵa qandaı nusqaý nemese tapsyrma bergenin jáne sol tapsyrmanyń aımaqtarda qalaı oryndalyp jatqanyn naqty biletin bolyp shyqty. *** «Qazaq ádebıeti» basylymynyń sońǵy sanynda «Búgingi qazaq BAQ-ynyń óresi men órisi» degen másele kóterilip otyr. «Aqparat ǵasyry atalyp ketken bul dáýirde kóp el qarýly kúshterin nyǵaıtýdan buryn álemdik aqparat keńistigin meılinshe keń ıgerýge basa nazar aýdaryp otyrǵany jasyryn emes. Tipti, ult janashyrlary úshinshi dúnıejúzilik soǵys aqparat soǵysy túrinde júrip jatqanyn aıtyp shyryldap júr. Al biz qazaq BAQ-ynyń órisiniń keń bolýyna qanshalyqty mán berip otyrmyz. Aqparat qaýipsizdigi elimizde qanshalyqty saqtalǵan? Bizdegi aqparat quraldary básekege qabiletti me?»,-dep jazady basylym. Osy oraıda gazet tilshisi bul másele boıynsha jýrnalısterdiń pikirin usynyp otyr.