Osy aıda Baıqońyrdan ekinshi «Proton-M» ushyryldy

BAIQOŃYR. QazAqparat - 29 qyrkúıekte Astana ýaqytymen saǵat 00:52-de  Baıqońyr aılaǵyndaǵy 200-alańnan qytaılyq «AzııaSat-9» jerserigimen «Proton-M» zymyran tasyǵyshy sátti ushyryldy, dep habarlaıdy QazAqparat.

Qazǵaryshtyń ǵarysh aılaǵyndaǵy jáne jerústi qyzmetteri ushyrylymnyń sátti ótkendigin jedel habarlady. «Proton-M» zymyranynyń birinshi, ekinshi jáne úshinshi bólikteri Qazaqstannyń Qaraǵandy oblysy, Reseıdiń Altaı ólkesi jáne Tynyq muhıttaǵy belgilengen aýdandarǵa qulady.
«Brız-M» údetkish blogynyń quramyndaǵy basty blok jáne «AzııaSat-9» ǵarysh apparaty ushyrylymnyń 582 sekýndynda ajyrady. Ary qaraı qytaılyq jerserikti belgilengen orbıtaǵa jetkizý «Brız-M» údetkish blogynyń besinshi qosylýy kezinde  júrgiziledi.

«AzıaSat-9» apparatynyń geostatsıonarlyq orbıtaǵa ornalasýy ushyrylǵannan soń toǵyz saǵattan keıin júzege asyrylady dep kútilýde.

Buryn habarlanǵandaı, reseılik aýyr «Proton-M» zymyranyn ázirleý jáne ushyrýǵa qazaqstandyq mamandar da qatysty. «Proton-M» zymyrany jyl basynan beri Baıqońyr aılaǵynan tórt ret ǵaryshqa attandyryldy, bul - qyrkúıek aıyndaǵy ekinshi ushyrylym.