Osy aptada 10 myńnan astam shetel azamaty JSN alýǵa ótinish bergen

ASTANA. QazAqparat – Osy apta ishinde qansha shetel azamatynyń jeke sáıkestendirý nómirin alýǵa ótinish bergeni belgili boldy, dep habarlaıdy QazAqparat tilshisi.

«Ótken aptada 12 798 shetel azamaty jeke sáıkestendirý nómirin (JSN) alýǵa ótinish berdi. Osy apta ishinde 10 354 sheteldik JSN alýǵa ótinish tapsyrdy. Sondaı-aq, halyqqa qyzmet kórsetý ortalyqtaryndaǵy klıentterdiń legin baıqaý maqsatynda beınebaqylaý kameralary qaraldy. Uzyn-sonar kezek baıqalmady», - delingen «Azamattarǵa arnalǵan úkimet» memlekettik korporatsııasynyń baspasóz qyzmeti taratqan habarlamada.

Buǵan deıin habarlaǵanymyzdaı, elimizde halyqqa qyzmet kórsetý ortalyqtarynyń jumys ýaqyty uzardy.

«Klıentter halyqqa qyzmet kórsetý ortalyqtarynda jumys ýaqytyn arttyrýdy burynnan surap keledi. Onyń ishinde mamandandyrylǵan halyqqa qyzmet kórsetý ortalyqtary da bar. Sebebi azamattar jumys kúnderi memlekettik qyzmetterdi alyp úlgermeı jatady. Osyǵan oraı bizdiń korporatsııa klıentterge yńǵaıly bolý úshin kúndelikti jumys ýaqytyn saǵat 20.00-ge deıin uzartty. Sondaı-aq, senbi kúni saǵat 13.00-ge deıin jumys isteıdi. Odan bólek, osy aptadan bastap mamandandyrylǵan qyzmet kórsetý ortalyqtary jumysyn qaıta jandandyrdy», - dep túsindirdi «Azamattarǵa arnalǵan úkimet» memlekettik korporatsııasynyń qoǵammen baılanys jónindegi basqarýshy dırektory Narıman Dúısekeev.