Ospan batyr týraly qoljazba arhıvke tapsyryldy

ALMATY. QazAqparat - Almatyda Ortalyq memlekettik ǵylymı-tehnıkalyq qujattama arhıvinde «Qazaqtyń altyn ańyzy – Ospan batyr jáne Nurǵojaı batyrdyń murasy» atty halyqaralyq ǵylymı-tájirıbelik konferentsııa ótti, dep habarlaıdy QazAqparat tilshisi.

Ospan batyr Islamulynyń el men jer úshin jasaǵan janqııarlyǵy, Qytaıdyń Gomın jáne kommýnıstik úkimetimen qan keship urys salǵan ult qaharmanynyń saıası áreketi, sondaı-aq, Nurǵojaı batyrdyń erlikteri men murasy konferentsııanyń basty taqyryby boldy.

Konferentsııa barysynda Ystanbul qalasynan arnaıy kelgen Nurǵojaı batyrdyń nemeresi Bahadúr Hadjıhan men Mımar Sınan kórkem óner ýnıversıtetiniń professory Ábdiýaqap Qara Ospan batyr týraly Nurǵojaı batyrdyń túpnusqa qoljazbasyn arhıv qoryna syıǵa tartty.

Aıta keteıik, qoljazba Nurǵojaı batyrdyń óz qolymen tóte jazýmen jazylǵan ári bul buryn-sońdy esh jerde jarııalanbaǵan.

Ortalyq memlekettik ǵylymı-tehnıkalyq qujattama arhıviniń dırektory Baıan Jumataevanyń aıtýynsha, qazaqtyń HH ǵasyrǵa tańbasyn basqan sońǵy batyry, Shyǵys Túrkistanda halqynyń egemendigi men azattyǵy jolynda kúresken Ospan batyr Islamulynyń qazaq tarıhynda alar orny óte zor.

«Amerıkalyq tarıhshy Lında Benson «Qazaqtyń altyn ańyzy» dep ataǵan Ospan Batyr búkil Altaı jerin jáne Shyǵys Túrkistandaǵy qazaqtardy ezip janshyp turǵan Qytaı gýbernatory Shyń Shy Saıdan azat etýge kúsh salǵan.

Osy tusta aıta keteıik, kúresker tulǵanyń ómir jolyn jańa, tyń qyrlarynan tanytatyn Ospan batyrdyń alǵashqy segiz komıssarynyń biri Nurǵojaı batyrdyń estelikteri úlken tarıhı mańyzǵa ıe. Óıtkeni Nurǵojaı batyr Ospan batyrdyń janynda bolǵan. Sondyqtan osy eki alyp tulǵany birge nasıhattaýdy maqsat etken bolashaq urpaqty rýhanı turǵydan baı, eljandy etip qalyptastyrýǵa yqpal eteri sózsiz», - deıdi Ortalyq memlekettik ǵylymı-tehnıkalyq qujattama arhıviniń dırektory Baıan Jumataeva.