Óskenbaev páter surap, kóshege shyqqan analarǵa: Sabyrlyq saqtaý kerek

NUR-SULTAN. QazAqparat – Aldaǵy úsh jyldyń ishinde kópbalaly otbasylardyń páter máselesi tolyqtaı sheshiledi. Bul týraly búgin Úkimet úıindegi baspasóz máslıhatynda QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev aıtty, dep habarlaıdy QazAqparat tilshisi.

Onyń atap ótýinshe, mınıstrlik kópbalaly analardyń baspana máselesin eki jolmen sheship jatyrmyz. Atap aıtqanda, aldymen «Baqytty otbasy» baǵdarlamasymen nesıe alyp, úı satyp alýǵa múmkindik beriledi. Al eger atalǵan baǵdarlamamen nesıe alyp, páter satyp alýǵa tabysy jetpese, onda mundaı otbasylarǵa aldaǵy jyldardyń ishinde jalǵa beriletin turǵyn úıler salynady. Qazirgi ýaqytta kópbalaly otbasy retinde páter kezeginde turǵan 40 myń adam bar.

«Jyl saıyn 6 myń páter salmaqpyz. Bıyl ondaı 8 myń úı salynady. Kelesi úsh jyldyń ishinde Qasym-Jomart Kemelulynyń (QR Prezıdenti Toqaev) tapsyrmasyna sáıkes baspana kezegi máselesin sheshemiz. Sondyqtan sabyrlyq saqtaý kerek. «Baqytty otbasymen» páter alýǵa múmkinshiligi joq otbasylardy úsh jyldyń ishinde úımen qamtamasyz etýge daıynbyz», - dedi Qaıyrbek Óskenbaev.

Osy rette birinshi vıtse-mınıstr baspana surap, kóshege shyǵyp júrgen kópbalaly analardyń da jaǵdaıyn túsinýge bolatynyn aıtty.

«Olar qazir alsam eken dep oılap otyr. Biraq sabyrlyq saqtaý kerek. Jergilikti ákimshilik belgilegen kezek bar. Ol kezektiń aldyna eshkim shyǵa almaıdy. Páterdi mende, mınıstr de, Úkimet basshysy da bere almaıdy. Óıtkeni zań bar. Zańǵa sáıkes sizdiń aldyńyzda 1 myń adam tursa, olardan buryn sizdiń jaǵdaıyńyzdy oılap men qalaı berem. Ondaı qolymnan kelse, kóringen adamdy tyǵa beremin ǵoı. Bekitilgen tártippen, kezekten úılerdi kútý kerek», - dedi ol.