Óskemenniń sol jaǵalaýyndaǵy úıler qaıta-qaıta jaryqsyz qalyp otyr

<p>ÓSKEMEN. KAZINFORM &ndash; Óskemen qalasynyń sol jaǵalaý bóliginde turatyn halyq jaryqtyń tym jıi óshetindigine shaǵymdanyp keledi.</p>

Qalanyń sol jaǵalaý bóligindegi turǵyn úılerdiń halqy jaryqtyń tym jıi, ásirese keshki ýaqytta óshetindigine shaǵymdanyp keledi.

«Keshke jumystan shyǵyp úıge kelgende tamaq pisire almaı qalamyz. Dúkenge baryp jeıtin birdeńe alyp, qarańǵyda telefonnyń shamymen otyramyz. Keıde keshke óshken jaryq tańǵa jýyq bir-aq qosylady. Óte yńǵaısyz. Bul másele tezirek sheshimin tapsa deımiz», - deıdi Jibek joly kóshesindegi kópqabatty úıde turatyn Qymbat Mýhamadıeva.

ShQO Energetıka jáne turǵyn úı-kommýnaldyq sharýashylyq basqarmasynyń málimetinshe, qalanyń sol jaǵalaý bóligindegi jaryqtyń jıi óshýi birneshe faktorǵa baılanysty bolyp otyr.

«Negizgi máselelerdiń biri – transformatorlyq qosalqy stantsııalarda ajyratqyshtardyń joqtyǵy. Osynyń saldarynan turǵyn úıler uzaq ýaqyt elektr jaryǵynsyz qalyp otyrady. Ajyratqyshtardy urlaý faktileri de tirkeldi. Eger bir qosalqy stantsııada ajyratqysh bolmasa kóshelerdiń kóp bóligi jaryqsyz qalady. Máselen, baý-baqsha qoǵamdastyǵynda qysqa tuıyqtalý boldy delik. Transformatorda ajyratqysh joq bolǵandyqtan ol búkil jelini óshiredi», - dep túsindirdi basqarma basshysy Nurlan Ramazanov.

Máseleni sheshý úshin joba ázirlengen. Bıyl kabeldik jelilerdiń 23 ýchaskesi men úsh taratýshy qosalqy stantsııany jóndeýge 466 mln teńge bólindi.

Kelesi jyly bul soma 550 mıllıon teńge bolyp, 86 ajyratqysh pen 50-ge jýyq kabeldik jeliler aýystyrylmaq.