Óskemenniń ekologııalyq máselesi qalaı sheshiledi – mınıstrdiń jaýaby
«Elimizde birneshe problemalyq qala men oblys bar. Sondyqtan, ár oblys pen ár qalaǵa qatysty máseleni sheshý jolyn izdedik. Ekologııalyq máselesi bar óńirlerdiń biri – Óskemen qalasy. Jalpy, Shyǵys Qazaqstannyń ekologııalyq ahýalyn bilemiz. Shyǵys Qazaqstandaǵy eń iri kásiporyndardyń biri – «Kaztsınk» kompanııasy. Ol Rıdder men Óskemen qalasynda jumys isteıtin iri mekeme. Biz sol mekemeniń basshysyn shaqyryp alyp, myna máseleni qalaı sheshýge bolady dep aqyldastyq. Bir jaǵynan jańa Ekologııalyq kodeks kúshine engennen keıin 2025 jylǵa deıin eń ozyq qoljetimdi tehnologııalar uǵymy paıda bolady. Degenmen, Óskemen qalasynyń problemasyn 2025 jyldy kútpeı, sheshý kerek dep oılaımyz», - dedi Maǵzum Myrzaǵalıev OKQ-da ótken baspasóz máslıhatynda.
Mınıstr «Kaztsınk» metallýrgııalyq kompanııasynyń basshysymen kezdesip, naqty kelisimge qol jetkizilgenin aıtady.
«Sol kelisimge sáıkes, «Kaztsınk» kompanııasy qatelespesem, 300 mln dollar qarajat salǵaly otyr. Olar osy soma arqyly fıltrdi emes, tehnologııany ózgertkisi keledi. Eń ozyq qoljetimdi tehnologııalardy 2025 jyldy kútpeı, kelesi jyldan bastap engizbek. Bizdiń esebimiz boıynsha bul tehnologııa 3-4 jyldyń ishinde aýaǵa taralatyn shyǵaryndylardy 20-30 paıyzǵa azaıtady. Bul – óte jaqsy nátıje, menińshe», - dedi ol.
Maǵzum Myrzaǵalıev «Kaztsınk» basshylyǵynan nelikten 2025 jyldy kútpeı, ozyq tehnologııalardy tezirek engizýge asyǵyp otyrǵanyn suraǵan.
«Bizdiń alǵan jaýabymyz mynadaı boldy: «Kaztsınktiń» qazirgi qojaıyny – eýropalyq kompanııa. Eýropada naryq pen ekologııalyq talaptar joǵary. Eger bizdiń kompanııalar eýropalyq deńgeıge shyqpasa, onda «Kaztsınk» kompanııasy óndiretin ónimderdi eýropalyqtardyń satyp alýy ekitalaı. Sondyqtan, kásiporyn atalmysh máselege qazirden bastap nazar aýdaryp otyr», - dedi ol.
Mınıstr Óskemen qalasynda aýany lastaıtyn negizgi úsh iri kásiporyn baryn, «Kaztsınk» kompanııasymen birge taǵy eki kásiporyn tıisti talaptar boıynsha jumys júrgizip jatqanyn jetkizdi.