Óskemennen nebári 80 shaqyrym jerdegi Joǵary Taıynty aýylynyń halqy ınternetke jarymaı otyr

<p>ÓSKEMEN. KAZINFORM &ndash; Shyǵys Qazaqstan oblysy Ulan aýdanyndaǵy Joǵary Taıynty aýyly Óskemennen nebári 80 shaqyrym jerde ornalasqan. Alaıda aýyl halqy kúni búginge deıin ınternetsiz otyr.</p>

«Bos ýádeden jalyqtyq!»

Joǵary Taıynty aýyly turǵyndarynyń ınternetti saryla kútip júrgenderine qanshama jyl bolǵan. Ákimdikke talaı-talaı ótinish te aıtypty. Byltyr eldi meken irgesine baǵanalar qoıylyp, munara kóterilgende halyq shyn qýanǵan. Alaıda ınternet qosylmaı, sıyrquıymshaqtanyp ketkende sol qýanyshtary sý sepkendeı basyldy.

- Ózim kópbalaly anamyn. Múmkindigi shekteýli qyzym bar. Ony úıde oqytamyz. ZOOM arqyly ótetin jınalystarǵa qatysa almaı qınalamyz. Sol úshin ınternet ustaıtyn Tarǵyn aýylyna baryp sendelýge týra keledi. Qashanǵy osylaı júremiz?!, - deıdi aty-jónin atamaýdy suraǵan aýyl turǵyny.

Internettiń joqtyǵy dárigerlerdiń de, áleýmettik qyzmetkerlerdiń de jumysyn qıyndatyp, júgin aýyrlatyp tur. Birinshileri naýqastardy bazaǵa tirkeı almasa, ekinshileri esep-qısaptaryn ótkize almaı áýre-sarsańǵa túsýge májbúr.

- Oblys ortalyǵynan nebári 80 shaqyrym jerde ınternet joq degen uıat qoı! Ákimdiktegilerdiń áne qosamyz, mine qosamyz degenine bıyl ekinshi jyl. Ýádeden ýáde. Halyq ta jalyqty. Bizge nátıje kerek!, - dep joǵarytaıyntylyqtar narazylyqtaryn bildirdi.

Ákimdik ne deıdi?

Osy máseleniń naqty qashan sheshiletinin Ulan aýdany ákimdiginen bilip kórdik.

- Joǵarǵy Taıynty aýylynyń mańyndaǵy antenna-machtalyq qurylǵynyń qurylysy aıaqtaldy. Qazirgi ýaqytta «KaR-Tel» JShS tehnıkalyq talaptaryna sáıkes, qajetti qujattamany ázirleý jáne olardy ýákiletti organdarmen kelisý jumystaryn júrgizip jatyr. Atalǵan jumystar aıaqtalǵannan keıin, naqty aıtqanda 2024 jyldyń sońyna deıin jaqyn mańdaǵy eldi mekender Beeline uıaly baılanys jelisine jáne 4G ınternetke qosylady, - dep jaýap berdi ákimdikten.

Demek, Joǵary Taıynty aýyly osy aıdyń sońyna deıin ınternetke qosylmaq. Bul jergilikti jurttyń kópten kútken tileginiń oryndalýyna sál ǵana qaldy degen sóz.

Aıta keteıik, búginde Shyǵys Qazaqstan boıynsha 155 aýylǵa ınternet tartylmaǵan. ShQO tsıfrlandyrý jáne arhıvter basqarmasynyń málimetinshe, osy jyldyń basynan oblys boıynsha 29 eldi mekenge ınternet tartyldy. Al 2027 jyldyń sońyna deıin barlyq aýyldy kezeń-kezeńimen ınternetpen qamtamasyz etý josparlanyp otyr.

Eske salsaq, osyǵan deıin Altyn adam tabylǵan ShQO aýylynda ınternet tartylmaı kele jatqany jaıly jazǵan edik.