Óskemendik jigit Katonqaraǵaıdyń sulýlyǵyn jeli arqyly jurtqa kórsetti

<p>ÓSKEMEN. KAZINFORM &ndash; Sońǵy kúnderi týǵan ólkesiniń qysqy sýretin áleýmettik jelide jarııalap jatqandar kóp. Baıqasańyzdar, bári mátinge #Qazalemi heshtegin qoıǵan. Buǵan prodıýser Nurlan Qoıanbaevtyń bastamasymen jarııalanǵan baıqaý sebep bolyp otyr.</p>

Osy baıqaýǵa qatysyp jatqandardyń biri – Óskemen qalasynda turatyn Erasyl Bolatbekov. Ol Katonqaraǵaı men Tarbaǵataıdyń qaraǵanda kóz qumaryn qandyratyn kórikti jerlerin foto-vıdeo túsirip alýǵa burynnan áýes.

Foto: Erasyl Bolatbekovtyń jeke arhıvinen

Tarbaǵataı aýdany Mańyraq aýylynda týyp-ósken Erasyl bıyl orda buzar otyzǵa tolǵan. Qazir Óskemendegi bankterdiń birinde ınkassatsııa bóliminde jumys isteıdi.

- Jumysymyzdyń ózindik qyzyqtary bar. Muqııattylyqty talap etedi. Sebebi qasymyzda únemi mol qarjy júredi. Bir ornynda otyrmaımyz. Árkez qozǵalystamyz. Qalada ǵana emes, oblystyń basqa aýdandaryna da jol tartyp jatamyz. Shyqqan saıyn Shyǵys Qazaqstannyń ásem tabıǵatyna ǵashyq bola túsemiz, - deıdi Erasyl Bolatbekov.

Foto: Erasyl Bolatbekovtyń jeke arhıvinen

Ol jumystan tys ýaqytta da tabıǵat aıasyna shyǵyp demalǵandy jaqsy kóredi eken. Sol kezde tylsymǵa toly tabıǵattyń túrli kórinisterin fotosýretke túsirip alýǵa áýes.

- Qalanyń qarbalasynan alystap, taýǵa, ormanǵa aıaq basqanda janym jaı tabady. Áıtpese gaz jutyp sharshaısyń ǵoı. Mundaǵy saf aýamen tynystap, keýde saraıyń ashylady. Kúıbeń tirliktiń qam-qareketin bir sátke umytyp, zańǵar taýlarǵa, jamyraı sybyrlasqan jasyl jelekke qarap tynyǵasyń. Maǵan ásirese Katonqaraǵaı aýdany unaıdy. Ol jaqtyń tabıǵatynyń keremetin sózben aıtyp jetkizý múmkin emes. Tek kórý kerek, - deıdi Erasyl.

Foto: Erasyl Bolatbekovtyń jeke arhıvinen

Nurlan Qoıanbaevtyń týǵan jerdiń qysqy kórinisin kórsetý baıqaýy jaıly áleýmettik jeliden bilgen. Birden qatysyp kórýge bel sheshken.

- Týǵan jerim Tarbaǵataı bolǵandyqtan, bul mekenniń taýlary maǵan erekshe ystyq. Óleńde: «Kók jıekpen ushtasqan, kóz jetkisiz aýmaǵy. Altaımen qol ustasqan – Tarbaǵataı taýlary» dep sıpattalatyn Tarbaǵataı taýlary meni tabıǵatqa yntyq etken shyǵar, bálkim? Aldaǵy ýaqytta Býrabaıdy kórgim keledi. Kórikti jerlerin tamashalap, fotosýretke túsirsem deımin. Osyndaı baıqaýlar jıi ótkizilip tursa degen tilegim bar. Sebebi paıdasy mol. Qazaqstannyń ásem jerlerin jurt bile túsedi, sol arqyly ishki týrızm de damıdy, - deıdi Óskemen qalasynyń turǵyny.

Foto: Erasyl Bolatbekovtyń jeke arhıvinen

Óz sózinde ol fotoǵa túsirgennen bólek taýda shańǵy tepkendi, sýda júzgendi jaqsy kóretinin jetkizdi.

- Áıelim, eki qyzym bar. Jubaıym da bankte jumys isteıdi. Satý bóliminde sarapshy. Úlken qyzymyz 6-da, kenjemiz 2 jasta. Tabıǵatqa shyqqandy otbasymyzben jaqsy kóremiz, - deıdi Erasyl.

Foto: Erasyl Bolatbekovtyń jeke arhıvinen

Eske salsaq, áleýmettik jelide Qazaqstannyń kórikti oryndary týraly foto-vıdeolar kóptep jarııalanyp jatyr. Bul bastamany prodıýser Nurlan Qoıanbaev kótergen.