Óskemendik muǵalimge 100 mln teńge jalaqy negizsiz tólenbek bolǵan
Shyǵys Qazaqstan oblysynda sońǵy 4 jylda bilim berý mekemelerindegi 50 qyzmetker sottaldy. Sonyń saldarynan memleketke 277 mln teńge zalal keltirilgen. Qazirgi ýaqytta bul somanyń 42%-dan astamy óteldi. Bul týraly búgin baspasóz brıfıngi barysynda ShQO boıynsha Sybaılas jemqorlyqqa qarsy qyzmet basshysy Denıs Shakenov málimdedi.
«Departament bilim salasyndaǵy sybaılas jemqorlyq táýekelderine taldaý júrgizdi. Sonyń barysynda kóptegen buzýshylyq pen sybaılas jemqorlyq táýekelderi anyqtaldy. Máselen, bıýdjettik ótinimdi jasandy túrde asyra baǵalaý. Óskemendegi kommýnaldyq mekemelerdiń birinde «Qosymsha bilim berý pedagogy» mamandyǵy boıynsha 7 bos orynǵa 2023 jylǵa arnalǵan bıýdjettik qarajat suranysynda 11 jyldan 29 jylǵa deıingi jumys ótili negizsiz kórsetilgen. Nátıjesinde bıýdjettiń jalpy somasy 16,2 mıllıon teńgege ulǵaıtyldy. Osylaısha, qajetsiz suralǵan qarajatty jymqyrý túrindegi sybaılas jemqorlyq táýekeli týyndady», - deıdi ol.
Taǵy bir sybaılas jemqorlyq táýekeli – bıýdjettik ótinimderdi qaǵaz júzinde rásimdeý. Óskemen qalasy mektepteriniń birinde matematıka páni muǵalimine belgilengen jalaqyǵa 35% qosymshanyń ornyna 3500% tólem kórsetilgen. Sonyń saldarynan tek bir muǵalimge 104,7 mln teńge jalaqy negizsiz tólene jazdady.
«Mektep qyzmetkerleriniń banktik kartochkalyq shottaryn aýystyrý arqyly bıýdjet qarajatyn jymqyrý faktileri de jıi kezdesedi. Rıdder qalasyndaǵy orta mektepterdiń birinde dırektordyń jáne bas býhgalterdiń jaqyn týystaryna 9,6 mln teńge qarajat jalaqy retinde negizsiz aýdarylǵan», - deıdi Denıs Shakenov.