Óskemendik Elmıra Tórehanova áıelderge tort pisirýdi tegin úıretip júr

<p>ÓSKEMEN. KAZINFORM &ndash; Ózin ǵana emes, ózgeni de oılaıtyn, altyn ýaqytyn basqalarǵa kómektesýge arnaıtyn eriktiler qandaı qurmetke de bolsyn laıyq. Óskemende turatyn Elmıra Tórehanova kópbalaly ana bolsa da erikti retinde talaı sharaǵa belsendi qatysyp keledi. Kondıterlikpen aınalysatyn oǵan túsetin tapsyrys ta kóp. Áıelderge tort pisirýdi tegin úıretip, olardyń tabys tabýyna múmkindik jasap kele jatqany taǵy bar. Ony áńgimege tartyp, osynyń bárine qalaı úlgeretinin surap kórdik.</p>

— Kondıterlik ónimderdi ázirlep kele jatqanyńyzǵa qansha jyl boldy? Qandaı ónimder jasaısyz?

— 2020 jyldan beri jasap kelemin. Tort, pechene men túrli desert jasaımyn. Biraq negizinen tortqa tapsyrys túsip jatady. Klıentterim kóbinese «Qyzyl barqyt», «Sútti qyz», «Výpı paı» jáne «Snıkers» torttaryn alady.

— Kásibińizdi dóńgeletý úshin memleketten qandaı da bir qarjylaı kómek alyp kórdińiz be?

— Iá. 400 AEK. Ol degenimiz 1 mln 225 myń teńge. Bul 2023 jyly. Soǵan kerek-jaraqtarymdy alyp, kásibimdi ary qaraı dóńgeletip ákettim.

Foto: Keıipkerdiń jeke muraǵatynan

— Ónimderińizdi qalaı saýdalaısyz?

— Áleýmettik jeliler arqyly jarnamalaımyn. Odan keıin Whatsapp messendjeri arqyly ár túrli toptarǵa taratamyn. Árıne basynda kórshi-qolań, tamyr-tanys qana tapsyrys beretin. Sosyn unatqandar ózderiniń jaqyndaryna aıta bastady. Sóıtip, klıentterim kóbeıe berdi. Tapsyrys bergenderge tortty óz kóligimmen tegin jetkizip beremin. Bálkim suranystyń kóptigi sodan da shyǵar.

— Ózińiz kópbalaly ana ekensiz. Neshe balańyz bar?

— 4 balam bar. Eki qyzym kolledjde oqıdy. Eki ulymnyń biri mektepte, biri balabaqshada. Negizi tort pisirýdi áýeli úlken qyzym qolǵa alǵan. Oǵan kómektesip júrip ózim úırenip kettim. Keıin qyzymnyń sabaqtan ýaqyty bolmaı, tort pisirý meniń kásibime aınaldy.

Foto: Keıipkerdiń jeke muraǵatynan

— Kópbalaly analarǵa kondıterlik ónimderdi jasaýdy tegin úıretedi ekensiz. Sol jaıly aıta ketseńiz…

— «Jan aǵa» qoǵamdyq birlestiginiń múshesimin. Ózimizdiń keńsemiz bar. Sonda analar jınalamyz, aqyldasamyz. Túrli qoǵamdyq sharalarǵa erikti retinde belsendi qatysyp kelemiz. Maǵan habarlasqan ár adamnyń betin qaıtarmaı, qolymnan kelgenshe kómektesýge tyrysamyn. Qaıyrymdylyqty da qolǵa alyp, muqtaj jandarǵa aqsha jınastyramyz.
Qazir kópbalaly analardyń basym bóliginde qarjy máselesi ózekti. Sebebi jumysqa shyǵyp keteıin dese balalaryn qaraý kerek. Sondyqtan osyndaı kýrs ashýǵa bel baıladym. Áıelder tort pisirýdi úırenip, keıin tapsyrys alyp, aqsha tabady. Osy ýaqytqa deıin 20-dan astam anaǵa úırettim.

— Osynyń bárine qalaı úlgeresiz?

— «Eńbek etseń emersiń» deıdi qazaq. Eshqashan jumys isteýden jalyqpaý kerek. Aldyńa maqsat qoıyp, soǵan jetý úshin umtylý qajet. Artqa qaraýǵa bolmaıdy. Tek alǵa qadam basyńyzdar. Adam istegendi adam isteıdi. Eńbek bolsa bárine de úlgeresizder!