Óskemendikter óz tańdaýyn jasaýda: Qaladaǵy saılaý ýchaskesinen fotoreportaj

ÓSKEMEN. QazAqparat – Óskemen qalasyndaǵy Kókjal Baraq kóshesinde oryn tepken №46 mektepte №97 saılaý ýchaskesi jumys istep tur. Tańerteńnen onda kelip jatqan halyq qarasy az emes. QazAqparat tilshisi atalǵan ýchaskege baryp, saılaýshylardyń belsendiligin kórip qaıtqan edi.

№97 saılaý ýchaskesi saǵat 07.00-de ashyldy. Saılaý ýchaskesiniń tóraǵasy Aıjan Jomartqyzynyń aıtýynsha, sol ýaqyttan bastap qazirge deıin 300-den astam adam kelip daýys berdi.

«Bıylǵy saılaýǵa erekshe daıyndaldyq. Sebebi QR Parlamenti Májilisi men jergilikti deńgeıdegi máslıhattar depýtattarynyń saılaýy bolǵandyqtan bıýlleten sany da kóp. Buryn saılaý kezinde 3 kabına qoıylsa, osy joly kabına sany taǵy ekeýge tolyqty. Múgedektigi bar adamdarǵa yńǵaıly bolý úshin arnaıy jabdyqtalǵan oryndar da bar», - deıdi ol.

Aıjan Jomartqyzynyń sózinshe, ýchaskede 10-nan astam baıqaýshy otyr. Olar saılaýdyń zań sheńberinde ótýin baqylaýda.

«Bizge Esenberlın kóshesi, 8, 8/1, 8/2, 13/1, 13/2, 13/3, 13/4, 13/5, 13/6 úıleri, Qazybek bı dańǵyly 9/1, 9/2, 9/3, 9/4, 9/5, 9/6 úıleri, Ál-Farabı dańǵyly 16, 18, 26, 28, 36, 40, 46, 38/1, 38/2, 38/3, 42/1, 42/2, 42/3 úıleri jáne №21-turǵyn aýdan kiredi. Bul mekenjaılarda 3 myńǵa jýyq adam turady. Jalpy, azamattardyń barlyq saılaýǵa belsendi qatysatynyn baıqadym. Sebebi osy úılerde memlekettik qyzmetkerler, muǵalimder kóp. Qazir de óz tańdaýlaryn jasap jatqandar az emes. 80-nen asqan qart áje de kelip daýys berip ketti», - deıdi №97 saılaý ýchaskesiniń tóraǵasy.

Baıqaýshylardyń birinen saılaýdyń qalaı ótip jatqanyn surap kórdik.

«El daýysy» qoǵamdyq qorynan baıqaýshy retinde osy ýchaskede otyrmyn. Saılaý talapqa saı ótip jatyr. Osy ýaqytqa deıin eshqandaı zańbuzýshylyq anyqtalǵan joq», - deıdi Gáýsár Pátiqan.

Daýys berý úshin ýchaskege kelgen Jibek matalar kombınaty yqsham aýdanynyń turǵyny Nurǵazı Kesembaevanyń búgin týǵan kúni eken. Menshik merekesinde saıası naýqannan qalys qalmaǵan ol óz tańdaýyn jasady.

«Osy ýaqytqa deıin elimizde bolǵan túgel derlik saılaýǵa qatysyp keldim. Saılaýda daýys berý – bizdiń otbasy úshin dástúrge aınaldy desek te bolady. Osy jolǵy depýtattar saılaýy dál týǵan kúnimmen tuspa-tus kelip otyr. Bul da tekten tekke emes shyǵar. Sol úshin óz daýysymdy berdim. Al týǵan kúndi erteń týǵan-týystyń ortasynda atap ótemin», - deıdi ol.

Qala turǵyny Shaımardan Mergenbaıulynyń aıtýynsha, bul saılaýdyń mańyzy zor.

«Ál-Farabı dańǵylynda turamyn. Elimizdiń, otbasymnyń, nemerelerimniń bolashaǵy úshin óz daýysymdy berdim. Aldaǵy ýaqytta Qazaqstanda oń ózgerister bolady dep senemin. Áleýmettik máseleler sheshimin taýyp, medıtsına sapasy jaqsarsa degen tilegim bar. Sodan soń zeınetaqy kólemi ulǵaısa eken, - deıdi zeınetker.

Aıta keteıik, Óskemende búgin 122 saılaý ýchaskesi jumys istep tur. Qala boıynsha barlyǵy 243 169 adam daýys berýge quqyly.