Óskemendik tergeýshi: Azamattardyń alǵysyn alǵanda jumystyń aýyrlyǵyn umytyp ketesiń
- Áńgimemizdi týyp-ósken jerińizden bastasaq...
- 1985 jyly Óskemen qalasynda dúnıege keldim. №44 orta mektepte bilim alǵan soń S.Amanjolov atyndaǵy Shyńys Qazaqstan ýnıversıtetine «quqyqtaný» mamandyǵyna tústim. 2008 jyly ýnıversıtetti bitirip, Glýbokoe aýdandyq polıtsııa bóliminiń tergeý bólimshesinde tergeýshiniń kómekshisi bolyp jumysqa ornalastym. 2011 jyldyń sáýir aıynda Óskemen qalalyq polıtsııa bóliminiń Úlbi polıtsııa bólimshesine tergeýshi bolyp aýystym. Eki jyldan soń aǵa tergeýshi atandym. 2015-2018 jyldary atalǵan bólimniń tergeý bólimshesin basqardym. 2020 jyldyń maýsym aıynan qazirgi ýaqytqa deıin Ertis polıtsııa bóliminde aǵa tergeýshi bolyp eńbek etip kelemin. Shenim – polıtsııa maıory.
- Tergeýshi mamandyǵyn tańdaýyńyzǵa ne sebep boldy?
- Otbasymyzda polıtsııa qyzmetkeri joq. Men bizdiń áýlettegi osy salaǵa bet burǵan birinshi adammyn. Joǵary oqý ornynda júrgende polıtseıler men tergeýshiler jıi kelip, semınarlar uıymdastyratyn. Óz jumystarymen tanystyryp, qatarlaryna shaqyratyn. Oqýdaǵy birinshi is-tájirıbemdi Úlbi polıtsııa bóliminde ótkizdim. Sol kezde maǵan tergeýshiniń jumysy unap, qyzyǵýshylyǵym arta bastady. Osylaısha, qolyma dıplom tıgende oılanbastan osy joldy tańdadym.
- Áýel basta tergeýshi jumysy qıynǵa soqqan shyǵar?
- Árıne, ońaı bolǵan joq. Jumystyń aýyrtpalyǵy birden sezildi. Ásirese túngi kezekshilikke qalǵanda qınalatyn edim. Óndirisimdegi qylmystyq ister bir sátte 10-nan asyp ketetin. Alaıda ýaqyt óte kele etimiz úırenip, tájirıbemiz qalyptasa bastady. Er adamdardan qalyspaı kúndiz-túni qyzmet etý daǵdyǵa aınalyp ketti. Qudaıǵa shúkir, sol eńbegimniń jemisin de kórip jatyrmyn. Joǵary kórsetkishterim úshin gramotalar, Alǵys hattar alyp, 2013 jyly oblys boıynsha úzdik tergeýshi atandym.
- Jumys barysynda este qalǵan erekshe ister boldy ma?
- 2012 jyldyń jazy. Úlbi polıtsııa bóliminde tergeýshimin. Jalpy bul bólimniń qaramaǵyndaǵy úlken kóshelerde túrli qylmystar bolyp jatady. Birde 30-gvardııalyq dıvızııa kóshesinde ornalasqan kolledjdiń qasyndaǵy stadıonda áıel adamdy uryp-soǵyp, tonap ketti. Kelesi kúni taǵy bir názik jandy zardap shekti. Odan keıingi kúni taǵy bireý qylmyskerdiń qurbany boldy. Osylaısha, eki aptanyń ishinde bir jerde 7 áıel tonalǵan. Bul stadıon arqyly Mırnyı kentine tóte jol bar. Jábirlenýshilerdiń barlyǵy úılerine qaıtyp nemese shyǵyp bara jatqan-dy.
Baıqaǵanymyzdaı, barlyq áıelderdiń jaqtary synǵan, demek tonaýshy bir ádispen áreket etken. Tutqıyldan soqqy berip, sómkelerin, paketterin tartyp alyp, taıyp turdy. Sondyqtan zardap shegýshiler onyń bet-álpetin durys kórip te úlgermegen.
Osydan soń polıtseıler stadıon mańaıyn torýyldap, kúndiz-túni ańdýmen boldy. Birde kózge ilikken jas jigit saqshylardy baıqaı salysymen qasha jónelgen. Alaıda alysqa uzamaı qolǵa tústi. Kezinde voleıbolmen aınalysqan onyń kúrzi judyryǵy rasymende bir soqqydan jaq syndyrarlyqtaı eken. Tergeý aıaqtalǵan soń, sot úkimimen er adam túrmege qamaldy.
Al qazir men esirtkige qatysty qylmystyq isterdi tergeýmen aınalysýdamyn. Buryn esirtki saýdalaýshy degende talaı ret temir torda jazasyn ótep shyqqan, kánigi qylmysker elesteıtin edi. Ókinishke qaraı, búginde murty endi tebindep kele jatqan bozbalalar osyndaı qylmysqa barýda. Máselen, byltyr qala boıynsha kámelettik jasqa tolmaǵan 2 bala asa iri mólsherde psıhotroptyq zattardy satý maqsatynda saqtaǵany úshin sottaldy. Onyń biri – Rıdder qalasynan Óskemenge oqýǵa túsken stýdent. Áke-sheshesinen jyraqta júrgen 16 jastaǵy jasóspirim osylaı paıda tappaq bolypty. Aqshanyń joqtyǵynan esirtki satty deýge kelmes. Ata-anasy onyń jalǵyz ózine páter jaldap bergen. Kóp jaǵdaıda jastar qymbat telefon alyp, sándi kıim kııý úshin teris jolǵa túsip jatady. Bul óte úlken másele.
Osy rette, biz aldyn alý sharalaryn da qolǵa alyp jatyrmyz. Mektepterge, kolledjder men ýnıversıtetterge baryp, jan-jaqty túsindirý jumystaryn júrgizýdemiz. Balalarǵa «jeńil aqsha tabamyn dep zańdy belden baspańyzdar. Bolashaqtaryńyzdy oılap, bilimderińizdi shyńdap, adal jolmen eńbek etýge umtylǵan jón» dep túsindirýdemiz.
- Jas tergeýshilerge qandaı aqyl-keńes aıtasyz?
- Jumysqa turyp, 1 jyl boıy qaýyrt qyzmettiń ystyǵyna kúıip, sýyǵyna tońyp shyqqan adam ary qaraı da istep ketedi. Meniń oıymsha, tergeýshi bolý úshin birinshi kezekte osy salaǵa degen qyzýshylyq qajet. Odan keıin shydamdylyq, qaısarlylyq, eńbekqorlyq bolý shart.
- Osy salany tańdaǵanyńyz úshin ókingen sátter boldy ma?
- Joq. Kerisinshe, azamattar shynaıy rızashylyǵyn, aq peıilderin bildirip jatqanda tańdaǵan baǵytymnyń durystyǵyna qýanyp, shabyttana túsemin. Saıajaılarda, páterlerde jasalǵan urlyqqa qatysty ister ashylǵanda ájelerimiz kelip alǵystaryn aıtyp, batalaryn bergen sátter men úshin óte ystyq, erekshe baǵaly. Osyndaı kezde jumystyń aýyrlyǵyn da umytyp ketesiń.
- Áńgimeńizge kóp rahmet !