Óskemendik sarbazdar «Baýyrjannan qalǵan batyr rýh!» atty chellendj bastady

ÓSKEMEN. QazAqparat - Qazaqstan Respýblıkasy Ulttyq ulany «Shyǵys» óńirlik qolbasshylyǵynyń áskerıleri halyq qaharmany Baýyrjan Momyshulynyń nasıhat sózderin jatqa aıtýdan «Baýyrjannan qalǵan batyr rýh!» atty «chellendj» jarııalady, dep habarlaıdy QazAqparat altaynews.kz-ke silteme jasap. 

Rolık avtorlarynyń aıtýynsha, chellendjdi barlyq qazaqstandyqtar kez kelgen tilde jalǵastyra alady.

«Biz bul «chellendjdi» jastardyń otansúıgishtik rýhyn kóterý maqsatynda qolǵa aldyq. Halyq qaharmany Baýyrjan Momyshulynyń sońynan qalǵan erlikteri men keıingige ólmes ónege bolyp qalǵan nasıhat sózderin tek 7-9 mamyrda ǵana eske almaı, erteńimiz úshin búginnen bastap barynsha nasıhattaı berýimiz kerek!» - deıdi «Shyǵys» óńirlik qolbasshylyǵy baspasóz qyzmetiniń jetekshisi Baǵdat Amangeldi.

Jobaǵa bastamashy bolǵan «Shyǵys» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystar jónindegi orynbasary, polkovnık Nııaztaı Álkeshev. 3 mınýttyq rolıkte batyr babamyzdyń nasıhat sózderin patrýldik qyzmette júrgen sarbazdar, arnaıy jasaq bólimi ofıtseri, rota komandıri, qaraýyl bastyǵy, kınologııa qyzmeti mamany, qurmet qaraýylynyń ofıtserleri jatqa oqıdy.

Beınerolıktiń túsirilimine Ulttyq ulannyń «Shyǵys» óńirlik qolbasshylyǵyna qarasty Óskemen gornızonynda ornalasqan 3 birdeı áskerı bólim qatysqan. Atap aıtqanda, qaladaǵy qoǵamdyq qaýpisizdikti kúzetetin 5518 áskerı bólimi, asa mańyzdy memlekettik nysandardy kúzetetin 3477 áskerı bólimi, sonymen qatar, qylmystyq-túzeý mekemelerin kúzetý mindetin atqaratyn 6699 áskerı bólimi.