Óskemendik kelinshek Naýryzda 3 ulttyń ókiline dastarhan jaıady

ÓSKEMEN. QazAqparat – Óskemende turatyn Oksana Kalıakperovanyń ákesi tatar, sheshesi orys, kúıeýi qazaq. Olar otbasynda jyl saıyn úsh ulttyń da merekelerin atap ótedi. Onyń ishinde áz Naýryzdyń orny bólek. Qazaq kelini Ulystyń uly kúninde úıde naýryz kóje men túrli ulttyq taǵamdardy ázirlep, qonaq kútýdi dástúrge aınaldyrǵan, dep habarlaıdy QazAqparat tilshisi.

«Anam áýlettegi eń súıikti kelin»

36 jastaǵy Oksana Óskemen qalasynda dúnıege kelgen. Búginde ol «Media Pro.kz» kompanııasynda vıdeomontajer bolyp jumys isteıdi.

- Áke-sheshemdi dostary tanystyrǵan eken. Ákem anamdy qatty unatyp qalyp, óz sezimin bildiredi. Alaıda ata-apam áýelde ekeýiniń úılenýine qarsylyq tanytqan. Sebebi balalarynyń tatar qyzyn ǵana áıeldikke alǵanyn qalaǵan. Biraq ýaqyt óte kele anamdy unatyp, kelisimderin bergen. Sóıtip, anam áýlettegi eń súıikti kelinge aınalyp ketti, - deıdi Oksana Kalıakperova.

Eki jarty bir bútin bolyp qosylǵan jubaılardyń tuńǵyshy – osy Oksana. 1 jyldan keıin Ravıl esimdi atustarlary jaryq dúnıe esigin ashqan.

- Kúıeýim Mıraspen 2007 jyly jumysta tanystyq. Men qaladaǵy «Kalken TV» telearnasynda vıdeomontajer bolyp jumys istep júrdim. Ol bizge operator bolyp jumysqa ornalasý úshin taǵylymdamadan ótýge keldi. Basshylyq maǵan «Óziń oǵan kamerany qalaı ustaýdy, jaryqty qosýdy, rakýrsty aýystyrýdy úıret» dedi. Osylaısha, áriptes retinde sóılesip júrdik. 2008 jyly kóńilimiz jarasqan soń kezdese bastap, 5 jyldan keıin úılendik, - deıdi áıel.

Onyń aıtýynsha, alǵashynda áke jaǵynan týystary toıǵa qarsy boldy.

- Alaıda jubaıymdy jaqynyraq tanyǵannan keıin batalaryn berdi. Mıras aqkóńil, aqjarqyn minezdi, árdaıym kúlimdep, ózgege qolynan kelgenshe kómektesip júredi. Toıymyz jaqsy ótti. Tek bir toı jasadyq. Qazaq, tatar, orys halqynyń salt-dástúrlerin saqtadyq. Betashar da boldy. Toı qysta ótkendikten aıazǵa baılanysty Reseı jaqtan týystarym kele almaı qaldy, - deıdi Oksana.

«Dımashty tyńdaǵandy jaqsy kóremiz»

Erli-zaıyptynyń eki balasy bar. Qyzdary Samına 9 jasta, al kenjeleri Bahtııar 7-de. Otaǵasy qazir jeke kásippen aınalysady.

- Jyl saıyn qazaq, tatar, orys halyqtarynyń merekelerin atap ótemiz. Ásirese, Naýryz, Qurban aıt, Sabantoı, Maslenıtsa, Pasha meıramdaryn asyǵa kútemiz. Onyń ústine Ulystyń uly kúninde enemniń týǵan kúni. Úıde et asyp, naýryz kóje men baýyrsaq pisirip, qonaqtardy qarsy alamyn, - deıdi keıipkerimiz.

Osylaısha, keń dastarhanda úsh ult jınalyp, emen-jarqyn áńgimelesip, kóńildi otyrady.

Oksananyń kúıeýi otbasynda kenje bolǵandyqtan anasy qolynda turady. Al ákesi 2009 jyly qaıtys bolǵan.

- Analarymyz bir-birimen óte jaqyn aralasyp ketti. Kezdesken saıyn qushaqtasyp, syr aqtarysady. Otbasylyq otyrystarda ekeýi de, ákem de únemi kúlip, máz-meıram bolady. Ákem óte qarapaıym adam. Bárimiz Dımashty tyńdaǵandy jaqsy kóremiz. Tipti úıde kún saıyn onyń óleńderi qosylyp turady. Sonda da bir ret te jalyǵyp kórgen emespiz. Dımashty ákemniń de, sheshemniń de týystary tyńdaıdy. Jalpy ony búkil álem jaqsy kóredi desek ótirik aıtqandyq emes, - deıdi Oksana Kalıakperova.

«Ulymyz órt sóndirýshi bolǵysy keledi»

Mıras pen Oksana balalaryna tusaýkeser jasap, uldaryn súndetke otyrǵyzǵan. Qyzdary Samına bıge qatysyp, Shyǵys Qazaqstan oblystyq «Altai» telearnasyndaǵy balalarǵa arnalǵan «TV-Kids» baǵdarlamasyn júrgizedi. 2021 jyly ol «Naýryz Party» atty qalalyq baıqaýǵa qatysyp, jeńimpaz atanǵan. Onda óz ónerip kórsetip, qazaq halqynyń salt-dástúrine, tarıhyna qatysty suraqtarǵa múdirmeı jaýap bergen.

- Ózim bos ýaqytymda sýret salyp, fıtnespen aınalysamyn. Al jubaıym fýtbol oınaǵandy jaqsy kóredi. Ulymyz da ákesi sııaqty dop tebedi, karatege qatysady. Bahtııar óskende órt sóndirýshi bolǵysy keledi. Es bilgeli osy mamandyqty tańdap, áli de sol oıynan bir aınyǵan emes. Al qyzymyz aǵylshyn tilin meńgerip, aýdarmashy bolýdy qalaıdy. Otbasymyzben jyl saıyn qaıyrymdylyq aktsııalaryna qatysamyz. Mysaly, 1 qyrkúıekte turmysy tómen januıadan shyqqan jeti balaǵa sómkeler men kerek-jaraqtardy alyp beremiz, Jańa jylda da syılyqtar jasaımyz, - deıdi otanasy.

Jalpy erli-zaıypty jyl kóleminde múmkindiginshe muqtaj jandarǵa qarjylaı kómek kórsetip, juma kúnderi sadaqa berip otyrady.

- Sóz sońynda barsha halqymyzdy Ulystyń uly kúnimen shyn júrekten quttyqtaǵym keledi! Áz Naýryz ár shańyraqqa qut-bereke ákelsin. Árdaıym elimizde, muqym álemde beıbitshilik bolyp, adamdar bir-birine tek jaqsylyq jasasyn. Ultqa, jerge bólinbeı, árbir janǵa janashyrlyq tanyta bileıik, - deıdi Oksana.