Óskemendegi qoqys suryptaıtyn zaýytta qatty turmystyq qaldyqtardyń 40%-y qaıta óńdeledi

ÓSKEMEN. QazAqparat – Óskemen qalasyndaǵy Qazaqstanda balamasy joq qoqys suryptaıtyn zaýytta qatty turmystyq qaldyqtardyń 40%-y qaıta óńdeledi, dep habarlaıdy QazAqparat tilshisi.

ShQO ákimdiginiń málimetine súıensek, Óskemende Qazaqstanda balamasy joq qoqys suryptaıtyn zaýyt iske qosylǵan. Halyqaralyq standarttarǵa tolyq sáıkes keletin zaýyt qatty turmystyq qaldyqtardyń 40 paıyzyn qaıta óńdeýge múmkindik beredi.

«Bul ekologııalyq jáne taktıkalyq turǵyda mańyzdy qadam. Óıtkeni buǵan deıin qala turǵyndary qoqys taqyrybyn ártúrli kezdesýlerde birneshe ret kótergen. Avtomattandyrylǵan jeli barlyq qaldyqtardy qaǵazǵa, plastıkke, metalǵa jáne qaıta óńdelmeıtin qaldyqtarǵa - organıkalyq zattar men qaldyqtarǵa suryptaıdy», - deıdi oblys ákimi Danıal Ahmetov.

Onyń aıtýynsha, óńirde qatty turmystyq qaldyqtardy jınaý jáne qaıta óńdeý júıesin jańǵyrtý jumystary jalǵasady.

«Jańa polıgon salǵannan keıin eskiniń barlyq qoqystary da suryptaýǵa ketedi. Zaýyttyń ónimdiligi saǵatyna 25 tonnany quraıdy. Bul Óskemen úshin jetkilikti», - deıdi aımaq basshysy.