Óskemendegi ekologııa máselesin birden sheshý múmkin emes – Danıal Ahmetov

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Óskemen qalasyndaǵy ekologııa máselesin sheshý maqsatynda qandaı sharalar atqarylyp jatqanyn aıtyp berdi, dep habarlaıdy QazAqparat.

«Sońǵy 5 jylda ekologııalyq protsesterdi damytýǵa 27 mlrd teńge bólingen. Іri zaýyttar da osy maqsatta qarjy jumyldyrýda. Biz kásiporyn basshylarynyń barlyǵymen kezdesip, kelissóz júrgizdik. Osynyń nátıjesinde jýyqta «Buqtyrma tsement kompanııasy» AQ arnaıy fıltr ornatty. Alaıda bul azdyq etýde. Aýadaǵy zııandy qaldyqtar mólsheri áli de kóp», - dedi Danıal Ahmetov halyq aldynda esep berý kezdesýinde.

Onyń aıtýynsha, óńirdegi ekologııalyq jaǵdaıdy jaqsartý maqsatynda 2020-2025 jyldarǵa arnalǵan arnaıy baǵdarlama ázirlengen. Mundaǵy maqsat – zııandy qaldyqtar mólsherin 7 paıyzǵa azaıtý.

«Árıne, 7 paıyzdy úlken kórsetkish deýge kelmeıdi. Alaıda talaı jyl sheshimin tappaı kele jatqan ekologııa máselesin birden sheshý múmkin emes», - dedi aımaq basshysy.