Óskemendegi áskerge shaqyrtý pýnktiniń tozyǵy jetken

ÓSKEMEN. QazAqparat – Óskemen qalasyndaǵy áskerge shaqyrtý pýnkti tozyp tur, dep habarlaıdy QazAqparat tilshisi.

Shyǵys Qazaqstan oblysynyń ákimi Ermek Kósherbaev Óskemendegi áskerge shaqyrtý pýnktine baryp, ondaǵy jaǵdaımen tanysty. Búginde bul pýnkttiń ǵımaraty men ishtegi tehnıkalardyń tozyǵy jetken.

«Bıylǵy kúzde 750 jigit osy jerden áskerge shaqyrylady. Búginde 175-i medıtsınalyq komıssııadan ótip, qyzmet oryndaryna jiberildi. Shaqyrý komıssııasynyń dárigerleri atap ótkendeı, tekserýler barysynda túrli aýrýy asqynǵan jastar anyqtalýda. Dıagnoz qoıylǵannan keıin olar turǵylyqty jerileri boıynsha emhanaǵa jiberiledi nemese aýrýhanaǵa jatqyzylady», - deıdi ákim.

Onyń aıtýynsha, shaqyrý pýnktiniń ǵımaratyn jóndep, jańa jabdyqtarmen qamtamasyz etý kerek.

«Jalpy, shyǵysqazaqstandyq jigitterdiń ásker qataryna óz nıetterimen barýy, kóbiniń shekara shebine shaqyrylýy qýantady. Sondaı-aq merzimdi qyzmetten ótken jastar granttyq negizde ýnıversıtetke túsý úshin jeńildikter ala alady. Bul da óte mańyzdy», - dedi E.Kósherbaev.