Óskemendegi jylý magıstralindegi apat: Jóndeý jumystary áli jalǵasyp jatyr

<p>ÓSKEMEN. KAZINFORM &ndash; Óskemen qalasyndaǵy Jibek matalar kombınaty yqsham aýdanynda keshe jylý magıstralindegi qubyr jarylyp, úıler jylýsyz qalǵan bolatyn. Qazirgi ýaqytta oqıǵa ornynda jóndeý jumystary júrgizilip jatyr.</p>

Jibek matalar kombınaty yqsham aýdanyndaǵy jylý magıstralindegi apattan 14 819 abonent jylýsyz qaldy. 

Qazir sol jerde eki brıgada aýysymmen jumys isteýde. Jóndeý jumystary úzdiksiz júrgizilip jatyr. 

«Barlyq qajetti tehnıka men qural-jabdyqtar bar. Apat shyqqan jerdi anyqtaǵan soń dereý dánekerleý jumystaryna kiristik. Qazir daladaǵy aýa temperatýrasy +1 gradýs», - deıdi «Shyǵys jylý» AQ jylý energııasyn berý departamentiniń dırektory Asqar Ospanov.

Oblystyq energetıka jáne turǵyn úı-kommýnaldyq sharýashylyq basqarmasynyń habarlaýynsha, barlyq jumys táýliktiń birinshi jartysynda aıaqtalyp, odan keıin úılerge jylý beriledi. 

Eske salsaq, osyǵan deıin Óskemendegi jylý magıstralinde qubyr jarylǵany habarlanǵan.