Óskemendegi maı ekstraktsııalaý keshenindegi iri órt aýyzdyqtaldy

<p>Óskemen qalasyndaǵy maı ekstraktsııalaý keshenindegi iri órt sóndirilip, 3000 tonna daıyn ónimniń janyp ketýine jol berilmedi, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

ShQO Tótenshe jaǵdaılar departamenti baspasóz qyzmetiniń málimetine súıensek, órt 17 qazanda tańǵy ýaqytta Prımykanıe kóshesinde ornalasqan JShS aýmaǵynda shyqqan.

«Maı ekstraktsııalaý kesheniniń keptirý kamerasynda kúnbaǵys dáni otqa orandy. Abyroı bolǵanda, zardap shekken eshkim joq. Aldyn ala boljam boıynsha órttiń shyǵýyna tehnologııalyq protsestiń buzylýy sebep bolǵan. Oqıǵa ornyna shuǵyl kelip jetken órt sóndirýshiler jalynmen kúreske kiristi», - delingen aqparatta.

Saǵat 06.25-te órttiń beti qaıtty. Sonyń arqasynda shamamen 3 000 tonna daıyn ónimniń janyp ketýine, ottyń jaqyn mańdaǵy órtený qaýpi joǵary qurylymdarǵa taralýyna jol berilmedi. 

Foto: ShQO TJD baspasóz qyzmeti

Tilsiz jaýdy aýyzdyqtaýǵa barlyǵy jeke quramnan 61 adam men 15 tehnıka, «Taza Óskemen» JShS-dan 6 adam men 3 tehnıka jáne «QTJ UK» AQ órt sóndirý poıyzy jumyldyrylǵan.

Órt saǵat 08:28-de tolyqtaı óshirildi.