Óskemendegi ekologııalyq joba halyqaralyq syılyqqa ıe boldy

<p><strong>ÓSKEMEN. KAZINFORM &ndash; Óskemendegi O.Bókeı atyndaǵy qalalyq ortalyq kitaphananyń &laquo;Borıs Şerbakovtyń jasyl úıi&raquo; eko-ortalyǵy&raquo; áleýmettik jobasy halyqaralyq EIFL syılyǵynyń jeńimpazy atandy. </strong></p>

Kitaphananyń balalar ekozerthanasy zamanaýı tsıfrlyq jabdyqtarmen jabdyqtalǵan. Balalar óz zertteýinde elektrondy mıkroskopty, «Jas ekolog» qurylǵysyn, sý, aýa, topyraq kórsetkishterin zertteýge arnalǵan jıyntyqty, 3D prınterdi jáne ınteraktıvti paneldi paıdalaný múmkindigine ıe boldy.

«Jurttyń ekologııalyq mádenıetin qalyptastyrý maqsatynda qolǵa alynǵan tyń baǵdarlama aıasynda zamanaýı tsıfrlyq eko-zerthana qurylǵan bolatyn. Qazirgi ýaqytta ekologııalyq bilim berýdegi túrli máselelerdi sheshýde tsıfrlyq jáne medıa saýattylyqtyń erekshe oryn alatyny sózsiz. Halyqaralyq sarapshylar úzdikterdi anyqtar aldynda ár jobany búge-shúgesine deıin zerdelep shyqqan. «Borıs Şerbakovtyń jasyl úıi» eko-ortalyǵy» jobasy jeńimpaz dep tanylǵan 4 jobanyń biri boldy», - deıdi O.Bókeı atyndaǵy qalalyq ortalyq kitaphana dırektorynyń orynbasary Aıgúl Ahmetjanova.

Foto: O.Bókeı atyndaǵy qalalyq kitaphana

Jas ekologtar 3D-prınter arqyly qustardyń uıasyn, kishkentaı jan-janýarlarǵa arnalǵan protezder jáne ósimdikterge arnalǵan ydystar, ekokádesyılar basyp shyǵaryp jatyr. Ólketanýshy-ǵalym Borıs Şerbakovtyń jetekshiligimen oqýshylar men muǵalimder Shyǵys Qazaqstanda sırek kezdesetin jáne quryp ketý qaýpi tóngen janýarlar men ósimdikter týraly «ShQO Qyzyl kitaby» elektrondyq derekter bazasyn qurǵan.