Óskemendegi ekologııalyq bıýro resmı túrde jumysyn bastady

<p>ÓSKEMEN. KAZINFORM &ndash; Óskemen qalasyndaǵy ekologııalyq qorǵaý bıýrosy resmı túrde óz jumysyn bastady.</p>

Shyǵys Qazaqstan oblysy máslıhatynyń janynan «Óskemen tynysy» ekologııalyq qorǵaý bıýrosy qurylǵan. Búgin osyǵan qatysty joba oblys ákimine tanystyrylyp, bıýro resmı túrde jumysyna kiristi.

- Buǵan deıin jaı qoǵamdyq uıym bolmaı, naqty jumystardy qolǵa alatyn ujymǵa aınalý úshin ne isteý kerektigi oılastyrylǵan bolatyn. Qalalyq máslıhat bizge qolaıly nusqalardy usynǵan joq. Zań boıynsha máslıhattarda turaqty komıssııalar, basqa da organdar qurylýy múmkin, biraq biz depýtat bolmaǵandyqtan qalaı isteıtinimizdi bilmedik. Onyń ústine dál osyndaı uıym qurǵandar da buryn bolmaǵan. Máseleni ShQO ákimdigine aıtqan soń oblystyq máslıhat bizge qoldaý kórsetti, - deıdi joba jetekshisi Elena Berezınskaıa-Abılova.

Uıymnyń maqsaty - Óskemendegi aýa sapasyn jaqsartýǵa yqpal etý jáne aımaqtaǵy kásiporyndarǵa salynǵan ekologııalyq aıyppuldardan túsken qarajatty bólý boıynsha usynystar engizý.

Eske salsaq, osyǵan deıin Óskemende ekologııa máselesin sheshý úshin arnaıy bıýro qurylyp, baqylaý kúsheıtiletindigi habarlanǵan.