Óskemende zorlanǵany týraly jalǵan aryz jazǵan áıel 4 jylǵa sottaldy

<p>ÓSKEMEN. KAZINFORM &ndash; Óskemen qalasynda óziniń zorlanǵany týraly polıtsııaǵa jalǵan aryz jazǵan áıel 4 jylǵa bas bostandyǵynan shekteldi.</p>

Arnaıy prokýrorlar júrgizgen tergeý barysynda áıel adamnyń osy jyldyń aqpan aıynda tanysymen páterde óz erkimen jynystyq qatynasqa túskeni anyqtaldy. Alaıda kelesi kúni ol quqyq qorǵaý organdaryna óziniń zorlanǵany týraly jalǵan aryz jazǵan. 

ShQO prokýratýrasy baspasóz qyzmetiniń málimetine súıensek, sonyń saldarynan jazyqsyz adamǵa qatysty qylmystyq is qozǵalǵan.

«Sotqa deıingi tergeý kezinde «jábirlenýshi» óz kinásin moıyndady. Oǵan QR QK-niń 419-baby 3-bóligimen (aýyr qylmys týraly kórineý jalǵan habarlaý) aıyp taǵyldy. Óskemen qalasy №2 sotynyń úkimimen áıel adam kináli dep tanylyp, shartty túrde 4 jylǵa bas bostandyǵynan shekteldi», - delingen aqparatta.

Úkim áli zańdy kúshine engen joq.

Eske salsaq, osyǵan deıin ShQO-da veıp satqandarǵa qatysty 11 qylmystyq is tirkelgeni habarlanǵan.