Óskemende zırattardy búldirgen eki adamdy sot 4 jylǵa sottady

ÓSKEMEN. QazAqparat – Óskemen qalasynda zırattardy búldirgen eki er adamǵa qatysty sot úkimi shyqty, dep habarlaıdy QazAqparat tilshisi.

Qalalyq №2 soty baspasóz qyzmetiniń málimetine súıensek, sottalýshylar metall synyqtaryn qabyldaý pýnktine ótkizý úshin zırattardy búldirip kelgen.

«Óskemenniń irgesindegi Glýbokoe aýdany Stepnoe aýylynda turatyn M. esimdi azamat qylmystyq áreketin oılastyrǵan soń tanysy Ý-men sóz baılasady. Ulan aýdany Qasym Qaısenov kentinde turatyn oǵan josparynyń búge-shigesin túsindirgen soń ekeýi iske kirisken. Aıyptalýshylar bir aıdyń ishinde qaladaǵy 7 zıratty búldirgen», - delingen aqparatta.

Sot otyrysynda er adamdarǵa QR Qylmystyq Kodeksiniń 314-baby (top bolyp aldyn ala sóz baılasyp, jerleý oryndaryn birneshe ret búldirý jáne qorlaý) jáne 188-baby (urlyq) boıynsha aıyp taǵyldy. Sottalýshylar óz kinálaryn tolyqtaı moıyndaǵan. Sot sheshimimen olar tórt jylǵa bas bostandyǵynan shekteldi.

Eske salsaq, Óskemende zırattardy búldirgen eki er adam ustalǵanyn habarlaǵan edik.