Óskemende jol apaty 17%-ǵa azaıdy

ÓSKEMEN. QazAqparat – Óskemen qalasynda jol-kólik oqıǵalary 17%-ǵa azaıdy, dep habarlaıdy QazAqparat tilshisi.

ShQO ákimdiginde ótken jınalys barysynda kólik salasyn tsıfrlandyrý máselesi sóz boldy. Qazirgi tańda beınetirkeý júıesi óziniń oń nátıjesin kórsetip otyr. Máselen, bıyl Óskemende jol-kólik oqıǵalarynyń sany 17%-ǵa tómendegen.

«Osy jyldyń basynan beri 6 myńnan astam ákimshilik jáne 88 qylmystyq is ýaqtyly ashyldy. Rıdder men Altaı qalalarynda «Sergek» júıesin ornatý úshin tıisti jobalar ázirlendi. Bul eki shaharda 560-qa jýyq kamera ornatylady», - dedi oblys ákimi Danıal Ahmetov.

Sondaı-aq sońǵy 2 aıda avtobýstar men tramvaılarda mobıldi qosymsha jáne kartalar arqyly jol júrý aqysyn tólegender úlesi 72%-dy qurady.

«Osylaısha, biz tasymaldaýshylar qyzmetiniń ashyqtyǵyn jáne osy salany sýbsıdııalaýdyń naqty deńgeıin kórip otyrmyz. Aldaǵy ýaqytta da kólik salasyn tsıfrlandyrý jumystary jalǵasyn tappaq», - dedi aımaq basshysy.