Óskemende jetim balanyń páterinde memqyzmetshi turyp jatqany jaıly aqparat - jalǵan

ÓSKEMEN. QazAqparat – Óskemen qalasynyń ákimdigi jetim balalarǵa beriletin jaldamaly páterdiń memlekettik qyzmetkerge berilgeni jaıly aqparatty teriske shyǵardy, dep habarlaıdy QazAqparat tilshisi.

24 qyrkúıekte buqaralyq aqparat quraldarynda qalalyq ákimdik qyzmetkerleriniń kámelet jasyna tolmaǵan jetim balalarǵa berilgen jaldamaly páterde turyp jatqany jaıly aqparat taraǵan. Osyǵan oraı bastamashyl top 100-den astam páterdi aralap, tekserý júrgizdi.

Anyqtalǵandaı, «Úmit» balalar úıiniń kámeletke tolmaǵan tárbıelenýshilerine berilgen páterlerdiń birinde basqa adam turyp jatyr. Naqtylanbaǵan málimet boıynsha, ol Óskemen qalasy ákiminiń apparatynda jumys isteıdi.

Ákimdiktiń málimetinshe, bul páter balalar úıiniń 13 jastaǵy tárbıelenýshisine tıesili. Biraq jasóspirim úıde jalǵyz ózi tura almaıtyndyqtan, balalar úıiniń basshylyǵy ol kámeletke tolǵanǵa deıin páterdi úshinshi adamǵa berý týraly sheshim qabyldaǵan.

«Bizge 4 jasynda kelgen balany birden baspana kezegine qoıdyq. Biraq onyń kezegi 18 jasqa tolmaı turyp kelip qoıdy. Páterden bas tarta almaımyz, óıtkeni sodan keıin bala múldem baspanasyz qalýy múmkin. Jetim jáne ata-ana qamqorlyǵynsyz qalǵan balalardy turǵyn úımen qamtý erejesi boıynsha bizdiń páterdi úshinshi tulǵaǵa jalǵa berýge haqymyz bar», - deıdi «Úmit» balalar úıiniń pedagogy Qarlyǵash Qusaıynova.

Onyń aıtýynsha, páterdi jalǵa berý kezinde balalar úıi jaldaýshynyń jumys ornyn anyqtaýǵa tıis emes. Al páterde ýaqytsha turatyn adam aı saıyn úıdi jalǵa alý baǵasy men kommýnaldyq tólemderdi tólep, balanyń esepshotyna 20 myń teńge aýdaryp otyrady.

Ákimdik ókilderiniń habarlaýynsha, atalǵan fakti boıynsha qyzmettik tergeý júrgizilgen. Sonyń nátıjesinde páterdi jaldap turyp jatqan adamnyń Óskemen qalasy ákimdiginiń qyzmetkeri emestigi anyqtaldy.