ÓSKEMEN. QazAqparat – Óskemen qalasynda «Jeltoqsan alaýy» atty músindik kompozıtsııa boı kóterdi, dep habarlaıdy QazAqparat tilshisi.
Qala ákimdiginiń málimetine súıensek, 16 jeltoqsanda Óskemende «Jeltoqsan alaýy» músininiń saltanatty ashylýy ótti.
Ol Ertis jaǵalaýyndaǵy Ǵashyqtar alleıasynda ornalasqan.
1986 jylǵy Jeltoqsan oqıǵasyna arnalǵan kompozıtsııanyń avtory – músinshi Nurbol Qalıev.
«Músinniń bıiktigi 5 metrge jetedi. Onda muzdy jaryp shyqqan búrkit beınelengen. Kompozıtsııanyń ashylýyna Óskemen qalasynyń ákimi Jaqsylyq Omar men Jeltoqsan oqıǵasynyń qatysýshylary keldi», - delingen aqparatta.
Saltanatty shara sońynda jınalǵandar músinge gúl shoqtaryn qoıdy.
Talǵatjan Muhametbekuly
Óskemendegi S.Amanjolov atyndaǵy ShQÝ-dy "Jýrnalıstıka" mamandyǵy boıynsha támamdaǵan. Eńbek jolyn 2015 jyly ShQO "Aldaspan" gazetinde tilshi bolyp bastady. ShQO "Meniń ólkem" gazetinde tilshi, respýblıkalyq "Jas qazaq", "Zań" gazetterinde Shyǵys Qazaqstan oblysy boıynsha menshikti tilshi, ShQO "Meniń ólkem" gazetiniń bas redaktory qyzmetterin atqarǵan. Kazinform agenttiginde 2021 jyldan beri jumys istep keledi.